सहरको कोलाहल छोडेर गाउँ फर्किएको कथा: ‘श्री बुकुरो’को मर्मस्पर्शी गीत सार्वजनिक

इटहरी/ “घर भनेको केवल ईंटा र माटोको संरचना मात्र होइन, यो त यादहरू र भावनाहरूको सङ्गालो हो ।” यही मर्मलाई आत्मसाथ गर्दै निर्माण भएको फिल्म ‘श्री बुकुरो : द होम कलिङ’ को पहिलो सांगीतिक कोसेली दर्शकमाझ आएको छ । निर्माण पक्षले शुक्रबार परेको सरस्वती पूजाको पावन अवसर पारेर फिल्मको मुख्य गीत ‘घर मेरो सानो बुकुरो’ सार्वजनिक गरेको हो ।

सार्वजनिक गीतमा तीन फरक पुस्ता र प्रतिभाको सुन्दर संयोजन सुन्न सकिन्छ । फिल्मका निर्देशक सुदीप भुपाल सिंहको शब्द रचना रहेको यस गीतमा वरिष्ठ संगीतकार रञ्जित गजमेरले संगीत भरेका छन् । गजमेरको मौलिक संगीतमा आधुनिक पुस्ताका लोकप्रिय गायक शिव परियारको बुलन्द स्वरले गीतलाई जीवन्त बनाएको छ । हेर्नुस् भिडियो ।

गीतको भिडियोमा फिल्मका मुख्य अभिनेता आर्शिवाद क्षेत्री र वरिष्ठ अभिनेत्री लक्ष्मी गिरीको यात्रा देखाइएको छ । सहरबाट गाउँ फर्किँदै गर्दा बाटोमा देखिने प्राकृतिक दृश्य र पात्रहरूको मनमा उब्जिएका भावनालाई भिडियोले निकै मार्मिक ढङ्गले पेश गरेको छ । ‘माला’ र ‘रुद्रप्रिया’ जस्ता फिल्ममार्फत आफ्नो पहिचान बनाएका निर्देशक सुदीप भुपाल सिंह यस फिल्ममार्फत ७ वर्षपछि निर्देशनमा फर्किएका हुन् ।

एक्सन र लभस्टोरीको भीडमा सिंहले ‘श्री बुकुरो’ मार्फत विशुद्ध पारिवारिक कथा पस्कने आँट गरेका छन् । निर्देशक सिंहका अनुसार, यो फिल्मले दर्शकलाई आफ्नोपनको महसुस गराउँदै पूर्ण मनोरञ्जन दिनेछ । रुबी सेन सिंहको निर्माण रहेको यो फिल्म आगामी फागुन १ गतेका दिन देशभरका हलमा प्रदर्शन हुनेछ । फिल्मको यसअघि सार्वजनिक टिजर र पोस्टरले दर्शकको मन जितिसकेको अवस्थामा यो गीतले फिल्म प्रतिको कौतुहल अझ बढाएको छ ।

@parikalanewsofficial

फिल्ममा आशीर्वाद क्षेत्री, लक्ष्मी गिरी, निकिता आचार्य, प्रतिकराज आचार्य, रोशनी कार्की, राजन इशान, दीपिका थापा, लय संग्रौला, मोहन निरौला, रामबाबु रेग्मी, रश्मी भट्ट लगायतका कलाकारहरुको अभिनय रहेको छ । फिल्मलाई मुस्ताङ, बाग्लुङ, कास्की, दमौली, मकवानपुर र काठमाडौंको मनोरम लोकेसन छायांकन गरिएको हो ।

फिल्मको लेखन तथा निर्देशक सुदीप भुपाल सिंह हुन् भने कोरियोग्राफी सुरज तामाङ र प्रवीण सिंह, सम्पादन बनिष शाह, चन्दन दत्त र परिच्छेद सेनले गरेका हुन् । सञ्जय लामा र राजेश श्रेष्ठको छायाङकन रहेको फिल्मको कलर तथा भिएफएक्स मनोरञ्जन श्रेष्ठले गरेका हुन् । गीत संगीतको पाटोमा रञ्जीत गजमेरका अलावा बसन्त सापकोटा र विक्रम कार्कीको पनि संगीत रहेको छ भने स्वरमा शिव परियारलाई विशेष पौडेल, युक्ति बिमली, सविन सुवेदी र सन्देश पौडेलले साथ दिएका छन् ।