पूजा शर्माको ‘आइटम डान्स’सँगै ‘कल्ली’को ६० दिने छायांकन पूरा

इटहरी/ पर्दामा ‘देवता र राक्षस’ बीचको महायुद्ध देखाउने तयारीमा रहेको फिल्म ‘कल्ली’ को क्यामेरा अन्ततः ६० औँ दिनमा आएर बन्द भएको छ । आगामी फागुन १ गते हलमा रिलिज हुने तयारीमा रहेको यो फिल्मको छायांकन जुम्लाको हिउँ र सिरेटो छिचोल्दै काठमाडौंको चोभारमा आएर एउटा ‘ग्ल्यामरस’ अन्त्यका साथ सकिएको हो ।

फिल्मको ‘प्याकअप’ सामान्य भएन, निर्माण पक्षले अन्तिम समयमा नायिका पूजा शर्मालाई आइटम गर्ल बनाएर सरप्राइज दियो । केही समयदेखि पर्दामा नदेखिएकी र हालै बैवाहिक जीवनमा बाँधिएकी पूजा शर्माले ‘कल्ली’ मार्फत आफ्नो पुनरागमन गरेकी छिन्, त्यो पनि एकदमै फरक अवतारमा । आफ्नो फिल्मी करियरमै पहिलो पटक ‘आइटम डान्स’ गरेकी पूजाले चोभारको सेटमा ‘क्या राम्री’ बोलको गीतमा कम्मर मर्काउँदै सुटिङ प्याकअप गराएकी हुन् ।

निर्माता किरण नेपालीका अनुसार यो गीत खिच्न २ दिन लाग्यो । आशिष अविरल र मेलिना राईको स्वर, सुरेन्द्र रानाका शब्द र रामजी लामिछानेको कोरियोग्राफी रहेको छ । गीतमा पूजालाई नायक उत्तम प्रधान, किरण श्रेष्ठ र कलाकार सुलक्षण भारतीले साथ दिएका छन् ।

@parikalanewsofficial

पूजा भन्छिन्– “गीतको बिट सुन्ने वित्तिकै मन पर्यो, त्यसैले नाइँ भन्नै सकिनँ । बिहेपछि पहिलो काम, त्यसमाथि पहिलो आइटम डान्स, म निकै उत्साहित छु ।” लेकाली इन्टरटेन्मेन्ट र कस्तुरी प्रोडक्सनले मिलेर बनाएको यो फिल्म सामान्य होइन, स्टारहरूको ‘कुम्भमेला’ नै हो । लक्ष्मण सुनारको ‘एक्सन–कट’ र महेश दवाडीको लेखनमा तयार भएको फिल्ममा सौगात मल्ल, अर्पण थापा, बेनिशा हमाल, नाजिर हुसेन र वर्षा राउत जस्ता कलाकारहरू एकसाथ देखिँदैछन् ।

यति मात्र होइन, उत्तम प्रधान, विनोद न्यौपाने, रेयर राई, बेगम नेपालीदेखि बाल कलाकार उपेश ढकालसम्मको अभिनयले फिल्मलाई वजनदार बनाएको छ । जुम्लाको अर्गानिक लोकेसनमा निसाल पौडेलले खिचेका दृश्यहरूलाई मिलन श्रेष्ठले सम्पादन गर्नेछन् । फिल्मको टिजरले पहिले नै हाइप बनाइसकेको अवस्थामा, पूजा शर्माको यो ‘स्पेशल गीत’ सार्वजनिक भएपछि फिल्मको चर्चा झनै चुलिने निर्माण पक्षको दाबी छ ।