‘आ बाट आमा’को ट्रेलरले २४ घण्टा नपुग्दै जित्यो १० लाख दर्शकको मन

इटहरी/ हरेक नेपाली घरको एउटा साझा कथा छ- सन्तानको उज्ज्वल भविष्यको सपना र त्यसका लागि चुकाउनुपर्ने ‘विछोड’ को मूल्य । यही मर्मस्पर्शी विषयवस्तुमा बनेको फिल्म ‘आ बाट आमा’ को ट्रेलरले रिलिज भएको २४ घण्टा नबित्दै युट्युबमा तहल्का मच्चाएको छ । बुधबार काठमाडौंमा एक भव्य कार्यक्रमका बीच सार्वजनिक गरिएको ३ मिनेट लामो ट्रेलरले दर्शकको मन यसरी छोएको छ कि २४ घण्टा नपुग्दै यसले १० लाख भ्युज पार गरिसकेको छ ।

साथमा ५३ हजार लाइक र १८ सयभन्दा बढी सकारात्मक प्रतिक्रियाहरू प्राप्त हुनुले फिल्मप्रति दर्शकको उच्च अपेक्षालाई पुष्टि गरेको छ । ट्रेलरले बासुदेव र देवकीको सानो तर सुखी गाउँले संसारलाई देखाउँछ । उनीहरूको एउटा होनहार छोरा छ- कृष्ण, जो गाउँकै स्कुलमा पढाउँछ । तर, जब पारिवारिक खुसीलाई दीर्घकालीन बनाउने सपना बोकेर कृष्णले ‘विदेश’ जाने निर्णय लिन्छ, तब त्यो हँसिलो घरको आँगनमा सन्नाटा छाउँछ । हेर्नुस् ट्रेलर ।

फिल्मले आमाबुवाले छोरा हुर्काउन गरेको संघर्ष र बुढेसकालको सहारा ठानिएको छोरा रोजगारीका लागि टाढिँदा आमाको मनमा चल्ने आँधीलाई मुख्य विषय बनाएको छ । यसमा पारिवारिक ड्रामा मात्र होइन, त्रिकोणात्मक प्रेमकथा र अध्यात्मको लेप पनि समिश्रण गरिएको छ । लामो समयपछि नेपाली फिल्म क्षेत्रमा फर्किएकी अभिनेत्री विपना थापाले ‘आमा’ को भूमिका मार्फत बलियो पुनरागमनको संकेत दिएकी छिन् ।

यस्तै, बलिउड तथा साउथ इन्डियन फिल्मका चर्चित अभिनेता प्रदीप रावत बुवाको सशक्त भूमिकामा देखिएका छन् । यता छोरा ‘कृष्ण’को भूमिकामा अभिनेता पल शाहले गाउँले युवक र परदेशीको मनोभावलाई प्रस्तुत गरेका छन् । फिल्ममा सिम्रन पन्त, उषा उप्रेती, चर्चित कथावाचक साईग्रेस पोखरेल र रवीन्द्र झाको अभिनयले पनि फिल्मलाई थप जीवन्त बनाएको छ । आर्या इन्टरटेन्मेन्टको ब्यानरमा निर्माण भएको यो फिल्मको लेखन तथा निर्देशन चन्द्र पन्तले गरेका हुन् ।

@parikalanewsofficial

अभिमन्यु निरवीको पटकथा रहेको फिल्मको छायाङ्कनमा नवराज उप्रेती र सम्पादनमा साहिल खान तथा मिलन श्रेष्ठ रहेका छन् । फिल्मका कार्यकारी निर्माता करण सिंह रसाईली हुन् भने कृष्ण प्रसाद सुवेदी, ओमकार पन्त, ध्रुव न्यौपाने, प्रकाश कुँवर र क्षितिज ढुंगानाले संयुक्त रूपमा लगानी गरेका छन् । पारिवारिक प्रेम, त्याग र आधुनिक युवापुस्ताको विदेश मोहले निम्त्याउने सामाजिक मनोविज्ञान बुझ्न चाहने दर्शकका लागि यो फिल्म यही माघ १६ गतेबाट देशभरका हलमा प्रदर्शन हुँदैछ ।