माओत्से गुरुङको ‘पेन्सन पट्टा’ ३३ दिनमै प्याकअप

इटहरी/ बक्स अफिसमा फिल्म ‘दयारानी’ को लोभलाग्दो सफलतासँगै निर्देशनमा जमेका चरित्र अभिनेता माओत्से गुरुङको नयाँ प्रोजेक्टको छायांकन सम्पन्न भएको छ । गुरुङको निर्देशनमा तयार भइरहेको प्रतिक्षित फिल्म ‘पेन्सन पट्टा’ को सम्पूर्ण सुटिङ मंगलबार कास्कीको एक रिसोर्टमा ‘इन्डक्लयाप’ गरिएको हो । फिल्मको छायांकन जम्मा ३३ दिनमा पुरा भएको छ ।

छोटो समयमा पनि स्तरीय काम निकाल्न रातदिन नभनी खट्ने प्राविधिक तथा सहयोगी टिमप्रति निर्देशक गुरुङले विशेष आभार व्यक्त गरेका छन् । उनले आफ्नो टिमको लगनशीलताका कारण कुनै गाह्रो नभई समयमै काम सकिएको बताए । फिल्मको शीर्षक सुन्दा धेरैलाई यो कुनै भूतपूर्व लाहुरेको परम्परागत कथा हो भन्ने लाग्न सक्छ । तर, लेखक तथा निर्देशक माओत्से गुरुङले दर्शकको यो अनुमानलाई गलत सावित गरिदिएका छन् ।

निर्देशक गुरुङको अनुसार “यो फिल्मको शीर्षकबाट लाहुरेको कथा जस्तो लागे पनि, यसको गुदी अर्कै छ । यो एउटा ‘लोभी केटा कसरी दानी बन्छ’ भन्ने रोचक मनोवैज्ञानिक यात्राको कथा हो ।” ‘माओत्से गुरुङ फिल्मस्’ को ब्यानरमा निर्माण भएको यस फिल्ममा नेपाली फिल्म क्षेत्रका हस्तीहरूको अभिनय देख्न पाइनेछ । मुख्य कलाकारहरूमा दयाहाङ राई, सुनिल थापा, विल्सन विक्रम राई, बुद्धि तामाङ, पशुपति राई, गौमाया गुरुङ, लुनिभा तुलाधर रहेका छन् ।

@parikalanewsofficial

यस्तै राज थापा काउचा, विश्वास गुरुङ, माया गुरुङ, यासिली राई लगायतका कलाकारहरुको पनि यो फिल्ममा अभिनय रहेको छ । हालसम्म फिल्मको प्रदर्शन मिति तय गरिएको छैन । निर्देशक गुरुङका अनुसार अबको केही दिनमा फिल्म पोस्ट प्रोडक्सनमा जानेछ । “हामी दर्शकलाई एउटा सुन्दर र परिपक्व फिल्म देखाउन चाहन्छौं । त्यसैले हतार गरेर सम्झौता गर्नुभन्दा, कामको गुणस्तर हेरेर मात्र रिलिज मिति घोषणा गर्नेछौं,” गुरुङले स्पष्ट पारे ।

गुरूङ फिल्मका ‘गडफादर’ मानिने माओत्से गुरुङ आफैंले पनि यसमा लगानी गरेका छन् । उनीसँगै मीन कोन्मे गुरुङ, यूकेका भोज बहादुर गुरुङ र सपना गुरुङ निर्माताको रूपमा रहेका छन् । फिल्मलाई रोहित र रत्नको आरआर फिल्मस् वितरण गर्नेछ । फिल्मलाई सुशन प्रजापतिले छायांकन गरेका हुन् । चरित्र अभिनेताको रुपमा स्थापित भइसकेका माओत्सेले पछिल्लो समय लेखन र निर्देशन विशेष गरी गुरुङ भाषाका फिल्मबाट सुरु गरेर मूलधारसम्म आफ्नो बलियो उपस्थित जनाइरहेका छन् ।