युट्युब ट्रेण्डिङको चौथो स्थानमा ‘कल्ली’ टिजर: मानिसभित्रको ‘देवता’ र ‘राक्षस’ बीचको लडाइँ

इटहरी/ आगामी फागुन १ गते प्रदर्शनको तयारीमा रहेको प्रतिक्षित फिल्म ‘कल्ली’को टिजरले दर्शकको मन जितेको छ । टिजर सार्वजनिक भएको २४ घण्टा नबित्दै युट्युबको ‘ट्रेण्डिङ’ सूचीमा प्रवेश गरेको टिजरले यो समाचार तयार गर्दैगर्दा चौथो स्थान ओगटेर फिल्मले बक्स अफिसमा बलियो उपस्थितिको संकेत गरेको हो ।

लक्ष्मण सुनारको कथा र निर्देशनमा तयार भएको यो फिल्मले केवल मनोरञ्जन मात्र नभई गम्भीर दार्शनिक विषय उठान गरेको छ । मानिसले जब आफ्नो इमानको ‘देवता’ मारेर लोभको ‘राक्षस’ जगाउँछ, तब निम्तिने विनाशको कथा फिल्मले पेस गर्नेछ । महेश दवाडीको लेखन रहेको फिल्ममा मिहिनेतलाई ‘देवता’ र लालचलाई ‘दानव’को विम्बका रूपमा प्रयोग गरिएको देखिन्छ । हेर्नुस् टिजर ।

फिल्मको प्रमुख आकर्षण यसको कलाकार टोली हो । टिजरमा अभिनेता सौगात मल्ल र अर्पण थापाको द्वन्द्व शसक्त देखिएको छ । साथमा बेनिशा हमाल, नाजिर हुसेन, वर्षा राउत, उत्तम प्रधान, सुलक्षण भारती, बेगम नेपाली र विनोद न्यौपाने जस्ता कलाकारहरूको अभिनयले फिल्मलाई वजनदार बनाउने अड्कल गर्न सकिन्छ । टिजरको अन्त्यमा देखिएकी नव-अभिनेत्री परिक्षा लिम्बुलाई फिल्मको ‘सरप्राइज प्याकेज’ मानिएको छ ।

@parikalanewsofficial

लेकाली इन्टरटेन्मेन्ट र कस्तुरी प्रोडक्सनको ब्यानरमा निर्माण भएको फिल्म प्राविधिक पक्षमा पनि अब्बल देखिएको छ । किरण नेपाली निर्माता र सुरज आचार्य निर्माण व्यवस्थापक रहेको फिल्ममा निसल पौडेलको उच्चस्तरको छायांकन र उत्कृष्ट ब्याकग्राउन्ड स्कोर सुन्न सकिन्छ । एनबी महर्जनको एक्सन र मिलन श्रेष्ठको सम्पादन रहेको फिल्ममा आशिष अविरल, सरित राई र केतन क्षेत्रीको संगीत रहेको छ । टिजरमा देखिएको मेकिङ शैली र संवादले ‘कल्ली’ लाई यस वर्षको प्रतिक्षित फिल्मको सूचीमा उभ्याएको छ ।