मिरमिरेको स्क्रिप्ट लेख्दै निर्देशक यम शेर्पाको दिमागमा दयाहाङ र सृजना

इटहरी/ एकातर्फ बक्स अफिसका ‘राजा’ मानिने अभिनेता दयाहाङ राई, अर्कोतर्फ गीत-संगीत र अभिनय दुवैमा अब्बल मानिने प्रकाश सपूत । दर्शकका यी दुई प्रिय ताराहरू पहिलोपटक एउटै पर्दामा देखिने भएका छन् । आगामी माघ १ गते रिलिज हुने फिल्म ‘मिरमिरे’ले यी दुईको अभिनयलाई एकसाथ हेर्ने दर्शकको चाहना पूरा गर्ने भएको हो । तर, ‘मिरमिरे’को विशेषता यतिमा मात्र सीमित छैन । यो फिल्ममा पुरानो विश्वासिलो टिमको पुनरागमन पनि भएको छ ।

निर्देशक यम शेर्पाले आफ्नो अघिल्लो फिल्म ‘कार्साङ’मा जसरी दयाहाङ राई र सिर्जना निङलेखुको जोडीलाई प्रस्तुत गरेका थिए, ‘मिरमिरे’मा पनि त्यही जोडीलाई निरन्तरता दिएका छन् । निर्देशक, नायक र नायिकाको यो त्रिकोणात्मक सहकार्य दोहोरिनु पछाडि ‘कम्फर्ट’ र ‘पात्रको माग’ मुख्य कारण रहेको बताइएको छ ।

निर्देशक शेर्पा भन्छन्, “पहिलो कामबाटै एक–अर्काको काम गर्ने शैली र बानी व्यहोरा थाहा हुने भएकाले दोस्रोपटक काम गर्न निकै सहज भयो । दयाहाङ जी सर्वप्रिय हुनुहुन्छ नै, त्यसमाथि कथा लेख्दा नै मेरो दिमागमा दयाहाङ र सिर्जनाको चित्र आइसकेको थियो ।” स्टार कास्टको चर्चा भइरहँदा फिल्मको मर्म भने बाबु-छोरीको सम्बन्धमा अडिएको छ । सार्वजनिक टिजरले एउटा जिम्मेवार बाबुको संघर्षको कथा बोल्छ ।

@parikalanewsofficial

श्रीमतीले घर छोडेर हिँडेपछि एक्लो बाबु अर्थात् दयाहाङले कसरी अबोध छोरी अर्थात् शाइसा गौचनलाई हुर्काउँछन् भन्ने विषय नै फिल्मको मुख्य कथा हो । आफ्नो जागिर जोगाउनु कि छोरीको स्याहार गर्नु ? घरको चुलोचौको सम्हाल्नु कि छोरीलाई स्कुल पठाउनु ? बाबुले निभाउने यो दोहोरो भूमिका र छोरीप्रतिको कर्तव्यले दर्शकको मन रुवाउने अनुमान निर्माण पक्षको छ । दयाहाङकी छोरीको भूमिकामा बाल कलाकार शाइसा गौचनको अभिनय सशक्त देखिएको छ ।

यार्सा फिल्म्सको ब्यानरमा बनेको यस फिल्ममा दयाहाङ, प्रकाश, सिर्जना र शाइसासँगै माओत्से गुरुङ, छुल्ठिम गुरुङ, भोलाराज सापकोटा, दिविशा पन्त, चिराग श्रेष्ठ लगायतको अभिनय छ । निमु शेर्पा, छोङ्बा लामा शेर्पा र आङ्छिरिङ शेर्पाको लगानी रहेको फिल्ममा वितरक कम्पनी आरआर फिल्म्सका रोहित कट्टेल कार्यकारी निर्माता छन् । गोविन्द बोहरा र सुदिप कुँवर सह–निर्माता रहेको फिल्मको लाइन प्रोड्युसर वीरेन्द्र शाही हुन् ।