सौन्दर्य उद्यमदेखि कोरियोग्राफीसम्म इटहरीकी उर्मिला मगरको छलाङ

इटहरी/ लामो समयदेखि कोशी प्रदेशको सौन्दर्य क्षेत्रमा आफ्नो बलियो उपस्थिति जनाउँदै आएकी उर्मिला मगर अब नयाँ भूमिकामा देखिएकी छिन् । एक सफल व्यवसायी र ‘ब्युटी क्विन’ को छवि बनाएकी उर्मिलाले अब नयाँ पुस्ताको प्रतिभा निखार्ने जिम्मा काँधमा लिएकी छिन् ।

सुनसरीको इटहरीमा आफ्नै ब्युटी पार्लर सञ्चालन गर्दै आएकी उर्मिला केवल व्यवसायी मात्र होइनन्, महिला सशक्तिकरणको एक दरिलो उदाहरण हुन् । उनले आफ्नो व्यवसायमार्फत रोजगारी मात्र दिएकी छैनन्, सीप सिक्न चाहने महिलाहरूलाई तालिम दिएर आत्मनिर्भर र दक्ष सौन्दर्यकर्मी बनाउन निरन्तर लागिपरेकी छिन् ।

केही समयअघि सम्पन्न ‘मिसेस पूर्वेली आइकन’ को दोस्रो संस्करणमा ‘सेकेन्ड रनर अप’ को उपाधि चुम्दै उनले आफ्नो क्षमता सिद्ध गरिसकेकी छिन् । सौन्दर्य प्रतियोगिताको त्यो अनुभव र आत्मविश्वासलाई अब उनी बालबालिकाहरूमा साझा गर्दैछिन् ।

@parikalanewsofficial

हाल उनी ‘जुनियर मिस्टर एण्ड मिस कोशी आइकन’ मा आधिकारिक कोरियोग्राफरको रूपमा अनुबन्धित भएकी छिन् । यस मञ्चमार्फत उनले साना बालबालिकाहरूलाई र्‍याम्पमा कसरी आत्मविश्वासका साथ हिँड्ने र आफ्नो प्रतिभा कसरी प्रस्तुत गर्ने भन्ने कला सिकाउनेछिन् । उर्मिलाको यो निरन्तरको लगनशीलता र नेतृत्व क्षमताले उनलाई कोशी प्रदेशको फेसन र ग्लामर क्षेत्रमा एक भरोसायोग्य नामको रूपमा स्थापित गर्ने आँकलन गर्न सकिन्छ ।