अबिषेक र आकृतिको प्रेमले भरिएको ‘कुमारी’को नयाँ गीत सार्वजनिक

ईटहरी/ भ्यालेन्टाइन डे अर्थात् प्रणय दिवसको अवसर पारेर आगामी माघ २३ गतेदेखि प्रदर्शनमा आउन लागेको नेपाली फिल्म ‘कुमारी’को दोस्रो गीत सार्वजनिक भएको छ । ‘तिमी बिना’ बोलको उक्त गीत केन्द्र मोसन पिक्चर्समार्फत डिजिटल प्रिमियर गरिएको हो । सार्वजनिक गीतमा केहर सिं लिम्बुको सुमधुर स्वर सुन्न सकिन्छ । गीतका शब्द सुमन तामाङले कोरेका हुन् भने सङ्गीत सुमन र केहर स्वयंको रहेको छ । गीतको अडियो प्रोडक्सन तथा मिक्सिङ मास्टरिङ एस्थर रिजनले गरेका छन् ।

सार्वजनीक गीतको ​भिडियोमा फिल्मका मुख्य पात्रहरू नवकलाकार जोडी आकृति राजभण्डारी र अबिषेक खड्का फिचर्ड छन् । उनीहरूको प्रेमिल भाव, आपसी सामिप्यता र उत्साहलाई भिडियोमा कलात्मक ढङ्गले प्रस्तुत गरिएको छ । यसअघि सार्वजनिक ‘कता छौ मेरो फूल’ गीतले पाएको सफलतापछि यो गीतले पनि दर्शकको मन जित्ने निर्माण पक्षको अपेक्षा छ । हेर्नुस् भिडियो ।

@parikalanewsofficial

पछिल्लो समय ‘प्रसाद’, ‘प्रकाश’ र ‘पुजार सार्की’ जस्ता गम्भीर सामाजिक कथामा केन्द्रित रहेका निर्देशक दिनेश राउतले ‘कुमारी’ मार्फत पुनः आफ्नो पुरानो विधा ‘लभ स्टोरी’ जनरामा कमब्याक गरेका छन् । ‘आइ एम सरी’, ‘नोभेम्बर रेन’ र ‘क्लासिक’ जस्ता सफल प्रेम कथानक फिल्म दिएका राउतको यो फिल्मले युवा पुस्तालाई हलसम्म तान्ने विश्वास गरिएको छ । बिनिश इन्टरटेन्मेन्ट र पिक्चर फ्रेमको ब्यानरमा निर्माण भएको यस फिल्ममा महेन्द्र अधिकारी निर्माता र केदार भुसाल कार्यकारी निर्माता रहेका छन् ।

@parikalanewsofficial

फिल्ममा अबिषेक र आकृतिसँगै घनश्याम जोशी, सुनिता श्रेष्ठ, आकाङ्क्षा कार्की, मधु खड्का, सनम श्रेष्ठ, सकु शाह, सरोज लामिछाने, मनषा शर्मा लगायतको अभिनय रहेको छ । ​विकास सुवेदीको कथा तथा स्क्रिप्ट रहेको फिल्मलाई सुसन प्रजापतिले छायाङ्कन गरेका हुन् । सुप्रिम पराजुलीको सम्पादन र कलर ग्रेडिङ रहेको फिल्ममा उत्तम न्यौपानेको साउन्ड डिजाइन छ । फिल्मको वितरण काठमाडौं उपत्यकामा डिसीएन र उपत्यका बाहिर कुवेर सिने डिस्ट्रीब्युशनले जिम्मा लिएका छन् ।