५०/५० हजार राशीको कोशी प्रदेशब्यापी ‘जूनियर मिस्टर एण्ड मिस कोशी आइकन’को घोषणा

इटहरी/ कोशी प्रदेशका विभिन्न शहर तथा जिल्लामा लुकेर रहेका बाल प्रतिभालाई एक वृहत मञ्च दिने उद्देश्य र उनीहरू भित्र रहेको सौन्दर्य तथा बौद्धिक कलालाई आम जनमानसमा पुर्याउने सोच सहित प्रदेशस्तरीय वृहत बाल सौन्दर्य प्रतियोगिता ‘जूनियर मिस्टर एण्ड मिस कोशी आइकन २०२५’ आयोजना हुने भएको छ । शुक्रबार इटहरी अवस्थित चिया चौतारी क्याफेमा पत्रकार सम्मेलन आयोजना गर्दै यो बारे जानकारी गराइएको हो ।

कोशी प्रदेशमा फेसन र मोडलिङको क्षेत्रमा लामो अनुभव संगालेको संस्था एल एण्ड सी मोडल एजेन्सी प्रा. लि. ले कोशी प्रदेशभरिका ७ देखि १४ वर्ष उमेर समूहका बालबालिकालाई लक्षित गर्दै यो प्रतियगिताको घोषणा गरेको हो । यसअघि एजेन्सीले सुनसरी लिटल प्रिन्स एण्ड एन्जल, विराटनगर लिटल प्रिन्स एण्ड एन्जल, प्रोभिन्सियल ब्राइडल फेसन शो, मिसेस धरान आइकन, लिटल मिस्टर एण्ड मिस धरान आइकन, मिस धरान सुपर आइकन, फेस अफ पूर्व लगायतका प्रतियोगिताहरू सफलतापूर्वक आयोजना गरिसकेको छ ।

एजेन्सीले बालबालिकाको आत्मविश्वास र नेतृत्व क्षमता बढाउन यो मञ्च तयार पारेको हो । संस्थाका सिईओ दिपक गिरिका अनुसार, यो केवल सौन्दर्य प्रतियोगिता मात्र नभई बालबालिकाको सर्वाङ्गीण विकासको पाठशाला हुनेछ । प्रतियगितामा सहभागी प्रतिष्पर्धी हरुलाई सहज बनाउन आयोजकले विभिन्न ७ शहरमा अडिसन र सोही स्थानमा तालिमको व्यवस्था गरेको छ ।

@parikalanewsofficial

तालिममा बालबालिकालाई पर्सनालिटी डेभलपमेन्ट, पब्लिक स्पिकिङ, योगा सिकाउनुका साथै संवेदनशील विषय ‘गुड टच–ब्याड टच’ बारे पनि सचेतना जगाइनेछ । यो सँगै अन्य बौद्धिक तथा ज्ञानवर्धक तालिमहरु पनि आयोजकले प्रदान गर्ने प्रतियोगीताका अफिसियल कोरियोग्राफर साहिल गीत चौधरीले जानकारी गराए ।

यो प्रतियोगिताको पहिलो अडिसन बराहक्षेत्रमा यही शनिबार अर्थात् पौष ५ गते हुनेछ । यसपछि धरानमा पौष १२ गते, उर्लाबारी पौष १५ गते, कानेपोखरीमा पौष १९ गते, दमकमा पौष २६ गते, विराटचोकमा माघ ३ गते, विराटनगरमा माघ १० गते र इटहरीमा माघ १७ गते यो प्रतियोगीताको अडिसन गर्ने समय तय गरिएको छ । स्थानीय तालिमपछि अडिसन लिएकै स्थानमा सेमिफाइनल राउण्ड हुनेछ र त्यहाँबाट छानिएका उत्कृष्ट ५/५ प्रतियोगीले ग्राण्ड फिनालेमा प्रतिस्पर्धा गर्नेछन् ।

प्रतियोगिताको शीर्ष उपाधि ‘जूनियर मिस्टर कोशी आइकन’ र ‘जूनियर मिस कोशी आइकन’ जित्ने बालबालिकाले नगद रु. ५०/५० हजार प्राप्त गर्नेछन् । त्यस्तै, फस्ट रनरअपलाई साइकल र सेकेन्ड रनरअपलाई ट्याब्लेट पुरस्कार दिइनेछ आयोजकले पत्रकार सम्मेलनमा जानकारी दिएको छ भने विजेता र उपविजेताहरु ६ जनालाई नै विजेता- उपविजेताको स्कुलमा सतप्रतिशत छात्रवृत्तिको लागि समन्वयन गरिने आयोजकको भनाइ छ ।