इटहरी / काठमाडौंमा १४ औं विन्ध्यवासिनी म्युजिक अवार्ड बिहीबार सम्पन्न भएको छ । अवार्ड प्रदान कार्यक्रममा नायक पल शाह र गायिका समिक्षा अधिकारीले एकै स्टेजमा अवार्ड थापेका छन्। ३१ विधामा प्रदान गरिएको “१४औ विन्ध्यवासिनी म्युजिक अवार्डमा नायक पल शाहले ” तिमि र म जाम माया” गीत बाट अवार्ड पाएका थिए भने गायिका समिक्षा अधिकारीले लोक तथा दोहोरी गायनमा जुरि अवार्ड पाएकि थिइन् ।
गायिका समीक्षा अधिकारीले नबोली नबोली बोलको गीत प्रस्तुत गर्दा नायक पल शाह र एलिना रायमाझी काजिश श्रेष्ठ, मौसम हिमाली, विजय पुनलगायतले विभिन्न गीतमा नृत्य प्रस्तुत गर्दा दर्शक निकै रमाएका थिए।
समारोहमा नेपालकै पहिलो क्याब्रे गीतकी ख्यातिप्राप्त गायिका मिरा राणालाई एक लाख रुपियाँसहित विन्ध्यवासिनी लाइफटाइम अचिभमेन्ट अवार्ड २०८० बाट सम्मान गरिएको छ। त्यस्तै, संगीतकार भूपेन्द्र रायमाझीलाई ५० हजार रुपिाँसहित विन्ध्यवासिनी साधना सम्मान, जनही नगद २५ हजार रुपियाँसहित पत्रकार शान्तिप्रियलाई विन्ध्यवासिनी कला पत्रकारिता सम्मान, गायक रुपक डोटेललाई प्रेमध्वज संगीत रत्न सम्मान र लोकगायक राजु परियारलाई झलकमान लोकसंगीत सम्मानबाट सम्मानित गरिएको छ। पूर्व मिस नेपाल सुगरीका केसीद्धारा सञ्चालित कार्यक्रममा गायिका लक्ष्मी सुवेदीलाई १५ हजार रुपियाँसहित अनवरत लोकदोहोरी श्रष्टा सम्मानबाट सम्मान गरिएको छ।
विन्ध्यवासिनी लाइफटाइम अचिभमेन्ट अवार्डबाट सम्मानित गायिका मिरा राणाको सम्मानमा गायिका बेनिसा पौडेलले उनीद्वारा स्वरबद्ध मखमली चोली चाहिँदैन बोलको गीत गाएकी थिइन्। त्यस्तै सम्मानित संगितकार भूपेन्द्र रायमाझीको सम्मानमा गायक सुमनकुमार श्रेष्ठले बिरही माया र फूल भए जिन्दगी बोलको गीत प्रस्तुत गरेर दर्शकलाई भावुक तुल्याएका थिए। कार्यक्रममा सम्मानित गायक रुपक डोटेलले आफ्नै गीत सपनी राम्रो देख्दिनँ, मेरो बोली सुन्दा, ए माइली, चोखो माया लाकै हो, मुस्कानमा अल्झिए कि, वनकी चरीजस्ता गीत गाएर मनोरञ्जन दिलाएका थिए। त्यसैगरी अर्का सम्मानित गायक राजु परियारले आफ्नो लोकप्र्रिय सामाजिक जागरणको गीत सुनपानीले छर्क मायालु गाएर माहोललाई भावुक बनाएका थिए। त्यस्तै गायक शिरिष देवकोटा र देवी घर्ती सुनीता बुढा क्षेत्रीले बैना हजुर, नजरैको भर, म त आउने थिइनजस्ता गीत प्रस्तुत गरेर कार्यक्रमको माहोल तताएका थिए ।
समारोहमा सुगम संगीततर्फ गायक गायिकाको अवार्ड निशान भट्टराई र काव्या आचार्यले, संगीतकारको अवार्ड बिबी अनुरागीले, गीतकारको अवार्ड सत्यराज चौलागाईंले, संगीत संयोजकको अवार्ड सुदीप सागरले हाँसिल गरे भने उत्कृष्ट गीतको अवार्ड विष्णु भण्डारीलाई प्रदान गरियो ।
अवार्डको आयोजक संस्था विन्ध्यवासिनी फाउण्डेशनकी अध्यक्ष लिना शर्मा रेग्मीको स्वागत मन्तव्यबाट शुरू भएको कार्यक्रममा मनीष गन्धर्व र उनको सारंगी स्कुलका विद्यार्थीले सारंगीमार्फत विभिन्न धुन प्रस्ुतत गरेका थिए। समारोहमा मस्ट पपुलर आर्टिस्ट अवार्ड पल शाह र पब्लिक च्वाइस अवार्ड एलिना रायमाझीलाई प्रदान गरिएको थियो।
Discussion about this post