‘रोल नं १’को लोकगीत ‘म्याग्दी रुमाले’ सार्वजनिक, फिल्म जेठ १५ मा रिलिज हुँदै

इटहरी/ वर्तमान शैक्षिक प्रणाली र यसले बालमनोविज्ञानमा पार्ने प्रभावको कथा बोकेको प्रतिक्षित नेपाली फिल्म ‘रोल नं १’को दोश्रो सांगीतिक कोसेली सार्वजनिक भएको छ । यसअघि फिल्मको टाइटल गीत सार्वजनिक गरिएको थियो । निर्माण पक्षले शुक्रबार फिल्ममा समावेश ‘म्याग्दी रुमाले’ बोलको उत्कृष्ट लोकलयको गीत सार्वजनिक गरेको हो । आगामी जेठ १५ गते देखि नेपाल र विदेशमा एकसाथ प्रदर्शनमा आउन लागेको यस फिल्मले सांगीतिक रिलिजसँगै आफ्नो प्रचारप्रसारलाई तीव्रता दिएको छ ।

सुष्मा सिग्देलको शब्दरचना रहेको यस गीतमा प्रशान्त शिवाकोटी र चर्चित गायिका शान्तिश्री परियारको सुमधुर स्वर सुन्न सकिन्छ । गीतमा संगीत भर्ने काम पनि गायक शिवाकोटी स्वयंले गरेका हुन् । मुख्य गायक-गायिकालाई सुरज तामाङ, विकास लिम्बू, दिवेश राई, दीपा सुहाङ, अप्सु योगी र मान्मा बी राईले गायनमा साथ दिएका छन् । गीतले एक युवाले आफूलाई मन परेकी युवतीलाई राखेको प्रेम प्रस्ताव र त्यसमा युवतीले फर्काएको रोचक जवाफलाई प्रस्तुत गरेको छ । हेर्नुस् भिडियो ।

जीवन सँगै बिताउने युवाको प्रस्तावमा हतार नगर्न र पारिवारिक अवस्था बुझ्न युवतीले गरेको आग्रहलाई कलात्मक ढंगले सवाल–जवाफ शैलीमा उतारिएको छ । मौसम हिमालीको कोरियोग्राफी रहेको यस गीतको भिडियोमा अभिनेता विनोद न्यौपाने र जुना विश्वकर्मालगायतका कलाकारको आकर्षक अभिनय र नृत्य देख्न सकिन्छ ।

महेश दवाडीको कथा लेखन तथा जोन योञ्जनको निर्देशनमा तयार भएको ‘रोल नं १’ ले आजको शिक्षा प्रणालीले बालबालिकाको मनोविज्ञान र उनीहरूको समग्र जिन्दगीमा पार्ने सकारात्मक तथा नकारात्मक असरलाई पर्दामा उतार्ने प्रयास गरेको छ । यो फिल्ममा मुख्य कलाकारका रुपमा मुकुन भुसाल, सुशांक मैनाली, रेणु योगी र सिर्जना अधिकारी रहेका छन् भने बाल कलाकारको रुपमा निर्भिक रेग्मी, रिन्चेन लामा, संयम कटुवाल र सिजल श्रेष्ठले अभिनय गरेका छन् ।

@parikalanewsofficial

हिमाली जिल्ला म्याग्दीका विभिन्न रमणीय तथा ग्रामीण भेगहरूमा छायांकन गरिएको यो फिल्म प्राविधिक रूपमा पनि निकै मजबुत रहेको निर्माण पक्षको दाबी छ । फिल्मको निर्माता विनोद पौडेल र जान्वी पौडेल रहेका छन् भने सह निर्माता छत्रमाया गिरी र रमेश चौलागाईं हुन् । शिवराम श्रेष्ठ छायांकन, मदन घिमिरेको सम्पादन, रोहित शाक्यको पाश्र्व संगीत रहेको फिल्ममा कला संग्रौला डिजाइनर रहेका छन् । रिच इन्टरटेन्मेन्ट र जे एम सिनेमाले वितरणको जिम्मा लिएको यो फिल्मलाई लिएर दर्शक तथा फिल्मकर्मीमाझ निकै चासो बढेको छ ।