विराटनगरमा ‘मुनामदन’ नाटक मञ्चन, मुनाको भुमिकामा चलचित्र पत्रकार रस्मी थापा

इटहरी/ महाकवि लक्ष्मीप्रसाद देवकोटा द्वारा लिखित चर्चित खण्डकाव्य ‘मुनामदन’ मा आधारित रहेर विराटनगरमा नाटक मञ्चन सुरु भएको छ । विराटनगर अवस्थित आरोहण गुरुकुलमा यो नाटक मञ्चन सुरु भएको हो । विराट आदर्श साहित्य मञ्चको आयोजनामा युवा साहित्यकार दिपक कट्वालको नाट्य रुपान्तरण तथा निर्देशन रहेको यो नाटक हरेक दिन तीन शो मञ्चन भैरहेको छ ।

गएको ४ गतेदेखि मञ्चन सुरु भएको नाटक हेर्न दर्शकहरुको उल्लेख्य उपस्थिति रहेको र नाटक हेर्न दर्शकहरु निकै उत्साहित रहेको आयोजकको भनाइ छ । कलेज र विद्यालयहरूले अग्रिम शो बुकिङ गरिरहेको मञ्चका प्रमुख सल्लाहकार मीनकुमार नवोदितले जानकारी दिए । यो नाटक ‘मुनामदन’मा चलचित्र पत्रकारितामा सक्रिय बन्दै गएकी रस्मी थापा पनि एक पात्रको रुपमा रहेकी छन् ।

उनले अभिनयमा समेत रुचि राख्ने उनी यो नाटकमा मुना पात्रको भुमिका निर्वाह गरिरहेकी छन् । थापा विराटनगरबाट संचालित मकालु टेलिभिजनमा मनोरञ्जन कार्यक्रमहरु संचालन गर्छिन् । थापासंगै यो नाटकमा लकेश दंगाल, मिलन चाम्लिङ राई, सुजता थापा, अतित निरौला, प्रदिप दाहाल, निर्जल पौडेल, दिवस ढकाल, एलिजा ठाकुर, आकृती थापा, सचिन लिम्बु, लिला लिम्बु र मलिना तामाङको अभिनय रहेको छ । यहि असोज १६ गतेसम्म मञ्चन हुने यो नाटक यसअघि विराटनगर, काठमाडौ, पोखरा र विराटचोकमा सफल मञ्चन भैसकेको छ ।