इटहरी/ पछिल्लो समय रङ्गमञ्चका गतिविधिहरु निकै देखिने गरेका छन् । काठमाडौ भन्दा बाहिर पनि बाक्लो रुपमा सकारात्मक प्रतिक्रियासहित नाटक मञ्चन हुनु राम्रो हो । यस्तैमा इटहरीमा अन्तर्देशीय नाटक महोत्सव सुरु भएको छ । भारतका नाट्यकर्मीसंगै कोशी प्रदेशमा रङ्गकर्म गरिरहेका विभिन्न नाट्य समुहहरुले इटहरीमा एकैस्थानमा आ-आफ्नो नाटक मञ्चन गर्ने भएका हुन् । जस्लाई ‘दोस्रो अन्तरदेशीय साझा रंगमञ्च २०८०’ नाम दिइएको छ । महोत्सव सुरुहुनु दुईदिनअघि हिजो शुक्रवार पनि नाटक मञ्चन भएको छ । ‘शत्रु’ नामक उक्त नाटक आज शनिबार समेत दिनको ठिक ३ बजे मञ्चन हुँदैछ ।
इटहरीस्थित तायारिप्ची भवनमा मञ्चन भैरहेको ‘शत्रु’ नाटकलाई एकीकृत सरकारी कर्मचारी संगठन नेपाल, सुनसरीको आयोजना तथा कलालय इटहरीको सहकार्य गरेको छ । विश्वेश्वरप्रसाद कोइरालाको कथा ‘शत्रु’लाई सोनु जयन्तीको परिकल्पनामा सुगम दुलालले नाट्य रूपान्तरण गरेका हुन् । यो नाटकलाई प्रज्वल पराजुलीले निर्देशन गरेका हुन् भने आइतबारबाट सुरुहुने ३ दिने महोत्सवको अन्तिम दिनमा समेत यो नाटक मञ्चन गरिनेछ । कलालय इटहरीले आयोजना गरेको यो नाटक महोत्सव अवधिभरमा कोशी प्रदेशका ३ नाटक र भारतका १ गरि जम्मा ४ ओटा नाटक मञ्चन गरिने भएका छन् ।
आयोजक संस्था कलालयका अध्यक्ष सोनु जयन्तीका अनुसार कार्तिक १९ गते महोत्सवको पहिलो दिन कृष्नगर जीवोनेर एकतान पश्चिम बंगाल, भारत’ नाट्य समूहले ‘एक्टु आगुन दे’ नामक नाटक मञ्चन गर्नेछ । सो दिन साँझ ४ बजे मञ्चन हुने नाटकलाई रोयले निर्देशन गर्नेछन् । यस्तै दमकको कदम थिएटरले महोत्सवको दोश्रो दिन अर्थात कार्तिक २० गते ‘जयमाया आँफू मात्रै लिखापानी आईपुगी’ नामक नाटक मञ्चन गर्नेछन् । जीवन बरालको निर्देशनमा तयार भएको उक्त नाटक सो दिनको बिहान ९ बजे मञ्चन गरिनेछ भने त्यही दिन साँझ ४ बजे ‘नेता जी’ नामक नाटक ‘आरोहण गुरुकुल, विराटनगर’ले भरत कार्कीले निर्देशनमा मञ्चन गर्नेछ ।
महोत्सवको अन्तिम दिन अर्थात कार्तिक २१ गते समापनको दिन ‘शत्रु’ नामक नाटक पुनः मञ्चन गरिनेछ । सो नाटक बिहान ९ बजे र साँझको ४ बजे मञ्चन गरिने आयोजक संस्थाका अध्यक्ष सोनु जयन्तीले बताए । यसअघि कलालयले नेपाल र भारतका १-१ नाटक मञ्चन गर्दै कोभिड १९ को संक्रमणअघि प्रथम अन्तर्देशीय नाटक मञ्चन गरेको थियो ।
Discussion about this post