इटहरी/ यही वैशाख २५ गतेबाट देशभर प्रदर्शनमा आउन लागेको प्रतिक्षित फिल्म ‘मालती मंगले’को प्रचारप्रसारका लागि फिल्मको टोली अर्थात् वैशाख ९ गते, बुधबार इटहरी आउने भएको छ । फिल्मको बारेमा जानकारी गराउन तथा दर्शकसँग प्रत्यक्ष साक्षात्कार गर्न दिउँसो पत्रकार भेटघाट र साँझ सांगीतिक कन्सर्टको आयोजना गरिएको हो ।
फिल्मको निर्माण टोली र कलाकारहरूसँगको अन्तरक्रियाका लागि बुधबार दिउँसो ठीक २ बजे पत्रकार सम्मेलन तय गरिएको छ । यही मेसोमा चलचित्र पत्रकार संघ नेपाल सुनसरी शाखा अफिस उद्घाटनको पनि तय भएको छ । लोकप्रिय गायक रामकृष्ण ढकाल लगायतका फिल्मका प्रमुख कलाकारहरूले शाखा कार्यालय उद्घाटन पश्चात सोही अफिसको हलमा फिल्मको पत्रकार भेटघाट गरिने भएको छ ।
पत्रकार भेटघाटमा फिल्मका निर्माता तथा लोकप्रिय गायक रामकृष्ण ढकाल, प्रमुख कलाकारहरू विजय बराल र वर्षा राउत, चर्चित कमेडियन मेक्सम गौडेल र गायिका सलिना विकको विशेष उपस्थिति रहनेछ । पत्रकार भेटघाटपश्चात बुधबार साँझ ६ बजेदेखि इटहरीको संगीत चोकमा फिल्मको लागि प्रचारात्मक सांगीतिक कार्यक्रम सञ्चालन हुनेछ । दर्शकहरूका लागि प्रवेश निःशुल्क गरिएको उक्त कन्सर्टमा गायक रामकृष्ण ढकाल, कलाकारहरू विजय बराल, वर्षा राउत लगायतका सम्पूर्ण टिमले आ-आफ्नो उत्कृष्ट प्रस्तुति दिएर दर्शकलाई मनोरञ्जन प्रदान गर्नेछन् ।
@parikalanewsofficial
संगीत चोक बजार व्यवस्थापन समितिको व्यवस्थापनमा सम्पन्न हुन गइरहेको यस कार्यक्रममा संघीय सांसद माननीय अशोककुमार चौधरी प्रमुख अतिथिको रूपमा उपस्थित हुनेछन् ।त्यसैगरी, विशिष्ट अतिथिको रूपमा इटहरी उपमहानगरपालिकाका नगरप्रमुख हेमकर्ण पौडेल, सुनसरीका प्रमुख जिल्ला अधिकारी (सिडिओ) वासुदेव घिमिरे र इटहरीकी उपमेयर संगीता चौधरीको उपस्थिति रहनेछ ।
कार्यक्रममा वडा अध्यक्षहरू, इटहरी उपमहानगरका प्रमुख प्रशासकीय अधिकृत (सहसचिव) महेश पराजुली, र जिल्ला सरकारी वकिल कार्यालयका प्रमुख केशव गौतम लगायतको समेत आतिथ्यता रहनेछ । यस भव्य सांगीतिक तथा प्रचारात्मक कार्यक्रमको मिडिया संयोजकको जिम्मेवारी चलचित्र पत्रकार संघ नेपाल, सुनसरीले सम्हालेको छ । आयोजकले सम्पूर्ण इटहरीवासी, सञ्चारकर्मी तथा फिल्म प्रेमीहरूलाई कार्यक्रममा उपस्थित भई मनोरञ्जन लिन अनुरोध गरेको छ ।
Discussion about this post