इटहरी/ नगेन कला प्रतिष्ठान पोखराको आयोजनामा ललितकला प्रज्ञाप्रतिष्ठान काठमाडौंमा सम्पन्न ‘कला क्रान्ति अभियान’ अन्तर्गत ललितकला क्षेत्रमा योगदान पुर्याउने उत्कृष्ट सर्जकको जनमतका आधारमा छनौट गरी सम्मान गरिएको छ । देश र विदेशका मतदाताले सामाजिक सञ्जालमार्फत भोटिङ गरेपछि इटहरीका साहित्यिक घर म्याट्रिक्सका सञ्चालक तथा चर्चित कलाकार विक्रमश्रीलाई ‘ललितकला हिरक वर्ष व्यक्ति’ सहित ६ विधामा सम्मानित गरिएको हो । ललितकला प्रज्ञा प्रतिष्ठानको अरनिको कक्षमा आयोजित यस कार्यक्रममा प्रमुख अतिथि कर्ण शाक्य, पूर्व कुलपति किरण मानन्धर, कुलपति नारदमणी हार्तम्छाली लगायतका विशिष्ट व्यक्तिहरूको उपस्थिति रहेको थियो ।
कार्यक्रममा विभिन्न प्रदेश र क्षेत्रका स्रष्टाहरूको सहभागिता रहेको थियो । विक्रमश्रीले सम्मान प्राप्त भएपछि धेरै संख्यामा जनमतले आफूलाई जिम्मेवारी सहितको अवार्ड दिएको र थप जिम्मेवारी महसुस भएको बताएका छन् । उनले देश तथा विदेशबाट मतदान गर्ने आत्मीयजन, इटहरीबासी, कलाकार साथीहरू, रंगकर्मी, साहित्यकार लगायत सबैलाई आभार प्रकट गर्दै उनीहरूको प्रेम, प्रेरणा र हौसलाको लागि धन्यवाद दिएका छन् । यस अभियानमा तीन चरणमा सामाजिक सञ्जालमार्फत भोटिङ गराइएको थियो ।
गूगल, फेसबुक, इन्स्टाग्राम, ह्वाट्सएप, एक्स (ट्विटर) र युट्युब लगायतका प्लेटफर्महरूबाट निःशुल्क भोटिङको व्यवस्था गरिएको थियो । अन्तिम छनौटमा ९० जना सर्जकहरू प्रतिस्पर्धामा थिए । विक्रमश्रीले मूर्तिकार राजु पिठाकोटे, दीपेन्द्र बनेपाली, एनबि गुरुङ्ग, सुनिल पौडेल, शुष्मा राजभण्डारी जस्ता सर्जकहरूसँग प्रतिस्पर्धा गर्दै उच्च मत प्राप्त गर्न सफल भएका थिए । विक्रमश्रीले यस सम्मानलाई केही महिना अगाडि प्रादेशिक ललितकला प्रदर्शनीमार्फत कलाका क्षेत्रमा पुर्याएको योगदानको सफलताको कडीका रूपमा ग्रहण गरेका छन् । उनसँगै, ‘ललितकला हिरक वर्ष नारी’ शुष्मा राजभण्डारी, ‘डायमण्ड वर्ष पुरुष २०७९’ डिल्ली आले लगायतका सर्जकहरूलाई पनि सम्मानित गरिएको छ ।
Discussion about this post