काठमाडौंमा ‘शोले’ निर्देशकको उपस्थिति र इरानी फिल्मको भावुक कथासँगै नवौं ‘निफ’ सुरु

इटहरी/ फिल्म केवल मनोरञ्जन मात्र होइन, यो भूगोल, भाषा र संस्कृतिलाई जोड्ने एउटा शक्तिशाली माध्यम हो । यही माध्यमको भूमिका निर्वाह गर्दै विश्वभरका ४० देशका कथाहरूलाई एउटै मञ्चमा ल्याएर काठमाडौंमा फिल्मको महाकुम्भ अर्थात् ‘नेपाल अन्तर्राष्ट्रिय चलचित्र महोत्सव (निफ)’ को नवौं संस्करण सुरु भएको छ । बिहीबार सुन्धारास्थित सिभिल मलको क्यूएफएक्स हलमा इरानी निर्देशक हिशान्त फराहमन्दको मन छुने फिल्म ‘माइ डटर्ज हेयर’ को विशेष प्रदर्शनीसँगै यस वर्षको निफले औपचारिक रूपमा पर्दा उघारेको हो ।

आगामी चैत २३ गतेसम्म काठमाडौंमा यो महोत्सव चल्नेछ । नेपाल सरकारकी सञ्चार तथा सूचना प्रविधि सचिव लक्ष्मीकुमारी बस्नेतको प्रमुख आतिथ्यतामा सम्पन्न उद्घाटन समारोहमा स्वदेशी तथा विदेशी विशिष्ट व्यक्तिहरूको बाक्लो उपस्थिति थियो । विशेषगरी बलिउडको कालजयी फिल्म ‘शोले’ का निर्देशक तथा निर्माता रमेश सिप्पीको उपस्थितिले महोत्सवको ओज झनै बढाएको थियो । साथै, कूटनीतिक तवरबाट नेपालका लागि ब्राजिलका राजदूत कार्लोस अल्बर्टो डेन हार्टोग, पाकिस्तानी राजदूत अब्रार एच हास्मी र श्रीलंकाकी राजदूत रुवन्थी डेलपिटियाले विशेष अतिथिका रूपमा मञ्च साझा गरेका थिए ।

चलचित्र विकास बोर्डका अध्यक्ष दिनेश डीसीसहित नेपाली फिल्म क्षेत्रका हस्तीहरू- पहिलो रंगीन फिल्म ‘कुमारी’का निर्देशक प्रेम बस्नेत, वरिष्ठ अभिनेत्री चैत्यदेवी सिंह र निर्देशक समुद्र रेग्मी लगायतको उपस्थिति समारोहमा थियो । समारोह केवल शुभकामना आदानप्रदानमा मात्र सीमित रहेन, फिल्म उद्योगको वर्तमान र भविष्यबारे महत्त्वपूर्ण विचारहरू पनि उठेका थिए । बलिउड निर्देशक रमेश सिप्पीले प्रविधिको तीव्र विकास र कृत्रिम बौद्धिकता अर्थात् एआईले प्रभाव जमाइरहेको वर्तमान समयमा मानव निर्मित कला र फिल्म महोत्सवहरूको महत्त्व अझ बढेको बताए ।

प्रमुख अतिथि सचिव बस्नेतले निफ जस्ता महोत्सवले नेपाली फिल्मलाई अन्तर्राष्ट्रिय बजारसम्म पुर्‍याउन र अन्य फिल्म उद्योगसँग सम्बन्ध विस्तार गर्न महत्त्वपूर्ण भूमिका खेल्ने विश्वास व्यक्त गरिन् । ब्राजिलका राजदूत हार्टोगले छनोटमा परेका ब्राजिली फिल्मको कथाबारे चर्चा गरे भने पाकिस्तानी राजदूत हास्मीले आफू तेस्रो पटक निफमा सहभागी हुन पाएको भन्दै खुसी व्यक्त गरे । निफका अध्यक्ष केपी पाठकले आमन्त्रण स्वीकार गरी विश्वभरबाट काठमाडौं आइपुगेका सम्पूर्ण अतिथि र फिल्मकर्मीप्रति कृतज्ञता ज्ञापन गरे ।

यसपटक निफमा दर्शकहरूले विश्वभरका ८८ वटा उत्कृष्ट फिल्महरू हेर्ने अवसर पाउनेछन् । आयोजकले दर्शकको सहजताका लागि सशुल्क र निशुल्क दुवै विकल्पहरू तयार पारेको छ । प्रतिस्पर्धामा रहेका मुख्य फिल्महरू सुन्धाराको सिभिल मल र ठमेलको छायाँ सेन्टरमा टिकट काटेर हेर्न सकिनेछ भने सिजाङ प्यानोरमा खण्ड अन्तर्गत ६ वटा चिनियाँ फिल्म र वृत्तचित्रहरू नेपाल पर्यटन बोर्ड र छायाँ सेन्टरमा निशुल्क प्रदर्शन हुनेछन् ।

यस्तै प्रतिस्पर्धा बाहिर रहेका ४ वटा रुसी फिल्महरू कमलपोखरीस्थित रसियन हाउसमा निशुल्क हेर्न पाइनेछ । महोत्सवको अर्को मुख्य आकर्षण भनेको ‘अन्तरक्रियात्मक कार्यक्रम’ हो । निफ अन्तर्गत १० वटा विशेष छलफल र मास्टरक्लासहरू आयोजना हुँदैछन्, जहाँ विभिन्न देशका दिग्गज फिल्म मेकरहरूले आफ्नो निर्माण अनुभव, संघर्ष र सफलताका कथाहरू नेपाली दर्शक तथा नवोदित फिल्मकर्मीहरूसँग साट्नेछन् ।