‘पूर्ण बहादुरको सारंगी’पछि उस्तै मार्मिक कथामा ‘रोल नं १’, सारंगीको सट्टा ‘दमाहा’ बोकेका बाबुको सङ्घर्ष

इटहरी/ बक्स अफिसमा ऐतिहासिक सफलता हात पारेको फिल्म ‘पूर्ण बहादुरको सारंगी’को निर्माण टोलीले आफ्नो आगामी फिल्म ‘रोल नं १’ का दुईवटा अर्थपूर्ण पोस्टर सार्वजनिक गरेको छ । सेभेन सिज सिनेमाको प्रस्तुति रहेको यस फिल्मका पोस्टरहरूले दर्शकमाझ कौतुहलता मात्र बढाएको छैनन्, बरु फिल्मको गहिरो विषयवस्तु र पात्र निर्माणको शैलीलाई पनि छर्लङ्ग पारेका छन् । अघिल्लो फिल्म पूर्ण बहादुरको सारंगी झैँ यस पटक पनि निर्माताहरूले समाजमा पिछडिएका भनिएका वर्गको कथालाई पर्दामा उतार्ने जमर्को गरेको पोस्टरबाट स्पष्ट हुन्छ ।

आज चैत १९ गते सार्वजनिक पोस्टरहरूको सबैभन्दा ध्यान तान्ने पक्ष भनेको यसको पात्र निर्माण हो, जुन ‘पूर्ण बहादुरको सारंगी’ सँग निकै मिल्दोजुल्दो देखिन्छ । उक्त फिल्ममा गरिबी र सामाजिक विभेदको चपेटामा परेको मुख्य पात्र बुवाले आफ्नो जीविकोपार्जन र छोराको भविष्यका लागि ‘सारंगी’ बोकेका थिए । तर, ‘रोल नं १’ मा आइपुग्दा बुवाको काँध र हातमा सारंगीको सट्टा ‘दमाहा’ र गजो देख्न सकिन्छ । दाह्री पालेका, मैलो टोपी र पुरानो कोट लगाएका बाबुको हातमा रहेको दमाहाले यो कथा सीमान्तकृत, दलित वा परम्परागत बाजा बजाएर जीविका चलाउने पिछडिएको वर्गको हो भन्ने स्पष्ट सङ्केत गर्छ ।

हुन त रोल नं १ पूर्ण बहादुरको सारंगी को सिक्वेल त हैन । तर, दुवै फिल्ममा गरिबी, अभाव र सामाजिक रूपमा पछाडि पारिएको वर्गको प्रतिनिधित्व समान छ । आफ्नो पेसा र आर्थिक दुरावस्थाका बाबजुद सन्तानको शिक्षा र उज्ज्वल भविष्यको सपना बोक्ने एक सङ्घर्षशील बाबुको विम्ब यसमा पनि मजबुत रूपमा उभ्याइएको छ ।

फिल्मको सार्वजनिक पहिलो पोस्टरमा तीन प्रमुख पात्रहरूलाई देखाइएको छ । केन्द्रमा एक सानो विद्यार्थी छन्, जसको अनुहारमा शिक्षाप्रतिको भोक, उत्साह र केही गरूँला भन्ने चमक छ । ऊ गाउँले परिवेश झल्काउने ऊनको स्वेटर र सर्टमा सजिएका छन् । उसको दायाँतर्फ भान्सामा प्रयोग गरिने कराई टाउकोमा घोप्ट्याएर उभिएकी आमा छिन्, जसको अनुहारमा जीवनको कठोर सङ्घर्ष पढ्न सकिन्छ, जसले भान्सामा सीमित विवाहित महिलाहरूको प्रतिनिधित्व गर्छ । बायाँतर्फ दमाहा बोकेका बुवा छन्, जसको अनुहारमा चिन्ता र थकान देखिन्छ । अभिभावकको निराशा र गरिबीको पृष्ठभूमिमा उभिएको छोराको उत्साहले ‘रोल नं १’ बन्ने हुटहुटीलाई दर्साउँछ ।

दोस्रो पोस्टर अझ बढी मार्मिक छ । यसमा दमाहा बजाएर वा जीवनको भारी बोकेर थाकेका बाबु भुइँमा सुतिरहेका छन् । उनकै ढाडमा सुतेर छोराले कापी च्यापेर एकोहोरिरहेका छन् । यसले फिल्मको ट्यागलाइन ‘हरेक विद्यार्थीको कथा’ लाई न्याय गरेको छ । यसले सङ्केत गर्छ कि सन्तानले ल्याउने ‘रोल नं १’ अर्थात् प्रथम स्थानको नतिजा पछाडि एउटा गरिब बाबुको पसिना, थाकेको शरीर र भोक लुकेको हुन्छ । फिल्ममा मुकुन भुसाल, सुशांक मैनाली, रेणु योगी, सिर्जना अधिकारीको लगायतको अभिनय रहेको छ भने बालकलाकारमा निर्भिक रेग्मी, रिञ्चेन लामा, संयम कटुवाल, सिजल श्रेष्ठ रहेका छन् ।

जौन योञ्जनको निर्देशनमा तयार भएको यस फिल्मलाई विनोद पौडेल र जान्वी पौडेलले निर्माण गरेका हुन् भने सह-निर्मातामा छत्रमाया गिरी र रमेश चौलागाईं रहेका छन् । फिल्मको कथा महेश दवाडीले लेखेका हुन् भने छायाङ्कन शिव राम श्रेष्ठ र सम्पादन मदन घिमिरेले गरेका छन् । फिल्मका गीतहरूमा प्रशान्त सिवाकोटीले संगीत भरेका छन् भने ब्याकग्राउण्ड म्युजिक रोहित शाक्यले तयार गरेका हुन् । ‘पूर्ण बहादुरको सारंगी’ ले जसरी बाबु-छोराको भावनात्मक सम्बन्ध र समाजको यथार्थलाई चित्रण गरेर दर्शकको मन जित्यो, ‘रोल नं १’ ले पनि दमाहा बजाउने बाबु र उसको विद्यार्थी छोराको सङ्घर्षमार्फत उही जादु दोहोर्‍याउने अपेक्षा गरिएको छ । ग्रामीण परिवेश र गरिबीको यथार्थपरक चित्रण रहेको यो फिल्म जेठ १५ गतेदेखि देशभरका फिल्म हलहरूमा प्रदर्शन हुँदैछ ।