झापाका सन्तोष बने ‘मिष्टर नेपाल २०२४’को विजेता, उनलाई मिस्टर वर्ल्डमा जाने अवसर

इटहरी/ सोल्टीमोड स्थित होटल सोल्टीमा शनिबार राति सम्पन्न ‘रियलमी मिष्टर नेपाल २०२४’ को भव्य समारोहमा झापाबाट सहभागी भएका सन्तोष लोक्समले उपाधि जित्न सफल भएका छन् । अब यससँगै, उनी ‘मिष्टर नेपाल वर्ल्ड २०२४’को मान्यता प्राप्त गर्दै आगामी नोभेम्बरमा भियतनाममा हुने ‘मिष्टर वर्ल्ड २०२४’मा नेपालको प्रतिनिधित्व गर्नेछन् । सन्तोषको विजयसँगै उनले ५ लाख रुपैयाँ मूल्यको पुरस्कार पनि प्राप्त गरेका छन् । साथै, एन्ट फाउन्डेसनले उनलाई सोसल एम्बेसडरको रुपमा पुरस्कार प्रदान गरेको छ ।

यस्तै भक्तपुरका योगेश श्रेष्ठले ‘मिष्टर ग्लोबल नेपाल २०२४’को उपाधि प्राप्त गरे । उनी आउँदो अक्टोबर महिनाको पहिलो हप्ता थाईल्याण्डमा हुने ‘मिष्टर ग्लोबल २०२४’मा नेपालको प्रतिनिधित्व गर्नेछन् । काठमाडौंका आयुष दुलाल ‘म्यान अफ द वल्र्ड नेपाल २०२४’ का रूपमा चयन भएका छन् र उनी ‘म्यान अफ द वल्र्ड २०२४’मा नेपालको झण्डा फहराउनेछन् । योगेश र आयुषले तीन लाख रुपैयाँ बराबर मूल्यका पुरस्कार पनि पाएका छन् । यता धरानका आदेश प्रधान र हेटौंडाका आयुष बमजन क्रमशः फस्टरनर अप र सेकन्ड रनर अप घोषित भएका छन् ।

‘मिष्टर नेपाल २०२४’ले युवा प्रतिभाको खोजी गर्दै बौद्धिकता, आकर्षण, र आत्मविश्वासको मुल्यांकन गरेको थियो । फाइनल प्रतिस्पर्धामा प्रतियोगीहरूले राइनो लेदरको पहिरनमा प्रारम्भिक प्रस्तुति दिएका थिए, त्यसपछि ब्ल्याकबेरीको मेन्स वेयरमा सजिएर फाइनलमा उत्कृष्ट प्रदर्शन गरेका थिए । नेक्स्ट मोडल्स नेपालद्वारा आयोजित यो राष्ट्रिय स्तरको प्रतियोगितामा ३८ जना युवाहरूको सहभागिता रहेको थियो । निर्णायक प्यानलमा फोटोग्राफर राजभाई सुवाल, युवा उद्यमी टिकाराम बुढाथोकी, अभिनेत्री तथा मोडल नीति शाह, पूर्व मिस नेपालद्वय माल्भिका सुब्बा र नम्रता श्रेष्ठ, र पूर्व मिष्टर नेपालद्वय डा. रुपक घिमिरे र सन्दिप पोखरेल रहेका थिए ।

विभिन्न विधागत पुरस्कारका विजेताहरूमा आयुष बमजनले रियलमी मोस्ट पपुलर, आदेश प्रधानले पब्लिक च्वाइस, आयुष दुलालले टेनएक्स वेष्ट पर्सनालिटी, पिन्टु सन्यालले टुसाल मोस्ट ट्यालेन्टेड, योगेश श्रेष्ठले आर्टसियम मिष्टर फोटोजेनिक, साकार बजिमयले प्रिमेरा मोस्ट इन्टिलेक्चुयल, मनोज गुरुङले बज्र वेष्टफिजिक, सन्तोष लोक्समले ब्ल्याकबेरी म्यान अफ एलिगेन्स, प्रकाश चौहानले योलो मोस्ट एक्टिभ, समिर तिमिल्सिना ले आवरण वेष्ट स्कीन, पियुष श्रेष्ठले जोय मेन च्वाइस, अनिकेत प्रजापति ले श्रीकेश वेष्ट हेयर, सिजल कपालीले राइनो मिष्टर फेसनिष्टा, अग्रज श्रेष्ठले प्रो स्टाइल मिष्टर स्टाइल आइकन, र मनोज गुरुङले केएफसी वेष्ट स्पोर्टस्मेनशीप अवार्ड जितेका छन् ।

यो प्रतियोगिता नेपालमा पुरुषहरूको व्यक्तित्व विकास र नेतृत्व क्षमता उजागर गर्ने उद्देश्यले आयोजना गरिएको हो, जसमा पाइलट, डाक्टर, इन्जिनियर, र चार्टर एकाउन्टेन्टहरू पनि सहभागी भएका थिए ।