प्रकृतिको काखमा अभिनेत्री शिल्पाको विवाह : प्रेमी फ्लावरसँग मुस्ताङमा कसिन् लगनगाँठो

इटहरी/ नेपाली फिल्म क्षेत्रकी चर्चित अभिनेत्री तथा मोडल शिल्पा मास्के विवाह बन्धनमा बाँधिएकी छन् । उनले आफ्ना प्रेमी तथा ट्याटु आर्टिस्ट फ्लावर केसीसँग जीवनको नयाँ अध्याय सुरु गरेकी हुन् । यो नवदम्पतीले विवाहका लागि कुनै भव्य सहर वा पार्टी प्यालेस नरोजि मुस्ताङको रमणीय र शान्त प्रकृतिको काखलाई आफ्नो विवाहस्थल बनाएका छन् ।

हिमाल, जङ्गल र पहाडले चारैतिरबाट घेरिएको मुस्ताङको सुन्दर गाउँ कोवाङमा उनीहरूको वैवाहिक समारोह सम्पन्न भएको हो । शिल्पाले सामाजिक सञ्जाल इन्स्टाग्राममार्फत विवाहका मनमोहक तस्बिरहरू सार्वजनिक गर्दै आफ्ना शुभचिन्तक तथा दर्शकसामु यो खुसीको खबर बाँडेकी छन् । तस्बिरहरूमा उनीहरू निकै खुसी र आकर्षक देखिएका छन् । शिल्पाले सधैँ प्रकृतिको बीचमा विवाह गर्ने कल्पना गर्दै आएको र मुस्ताङले त्यो सपनालाई जादुमयी ढङ्गले पूरा गरिदिएको बताएकी छन् ।

@parikalanewsofficial

उनले आफ्नो वैवाहिक क्षणलाई जीवनकै सबैभन्दा सुन्दर सम्झनाको रूपमा चित्रण गरेकी छन् । आफ्नो खुसी र भावना व्यक्त गर्दै उनले इन्स्टाग्राममा लेखेकी छन्, ‘हामीले सधैँ प्रकृतिको बीचमा विवाह गर्ने कल्पना गरेका थियौं, अनि कुनै जादुजस्तै मुस्ताङले हाम्रो त्यो सपना पूरा गरिदियो । हरेक क्षण सपनाजस्तै महसुस भयो । ती हिमाल, ती प्रार्थना, त्यो माया, त्यो शान्ति… सबै कुरा शब्दभन्दा पनि सुन्दर थियो । कहिल्यै कल्पना गरेको एउटा सपना आज हाम्रो जीवनकै सबैभन्दा सुन्दर सम्झनामध्ये एक बनेको छ ।’