राजेश हमालले रमेश सिप्पीलाई सोधे, ‘सोले फ्लप भएको भए के हुन्थ्यो ?’

इटहरी/ बलिउडको इतिहासमै सबैभन्दा सफल र प्रतिष्ठित फिल्म मानिने ‘शोले’ प्रदर्शन भएको दशकौं बितिसकेको छ, तर यसको जादु अझै उस्तै छ । शुक्रबार काठमाडौंमा जारी नेपाल अन्तर्राष्ट्रिय चलचित्र महोत्सव (निफ) को दोस्रो दिन यही जादुमय फिल्मका किस्साहरूले भरिपूर्ण रह्यो । नेपाल पर्यटन बोर्डको हलमा आयोजित ‘सिनेमा संवाद : रमेश सिप्पी र राजेश हमालसँग’ सत्रमा बलिउडका भेट्रान निर्देशक रमेश सिप्पी र नेपाली फिल्म क्षेत्रका ‘महानायक’ राजेश हमालबीच करिब एक घण्टा लामो रोचक र गहिरो कुराकानी भयो ।

संवादका क्रममा निर्देशक सिप्पीले ‘शोले’ निर्माणका पर्दापछाडिका थुप्रै रोचक तथ्यहरू दर्शकमाझ बाँडे । उनले प्रख्यात लेखकद्वय सलीम-जावेदसँगको सहकार्यको सम्झना गर्दै भने, “उनीहरूसँग एउटा सानो आइडिया थियो, जुन सुरुमा अरु कसैका लागि सोचिएको थियो । तर, ती व्यक्तिले ‘यो मेरो प्रकारको फिल्म होइन’ भनेर पन्छाएपछि उनीहरूले मलाई एक आर्मी अफिसर र दुई अपराधीको कथा सुनाए । म साँच्चै भाग्यमानी थिएँ कि ती अद्भुत लेखकहरूसँग मिलेर हामीले एउटा यस्तो स्क्रिप्ट तयार गर्‍यौँ, जसमा सिनेमालाई चाहिने सबै तत्वहरू थिए ।”

महानायक हमालले फिल्म ‘शोले’को तारिफ गर्दै भने, “यो यस्तो अद्भुत फिल्म हो, जसका मुख्य पात्र मात्र होइन, घोडाको नामसमेत दर्शकको मनमस्तिष्कमा अमेट छाप बनेर बसेको छ ।” सिप्पीले स्क्रिप्ट तयार भएको ६ महिनापछि सन् १९७३ अक्टोबर २ बाट फिल्मको छायाङ्कन सुरु भएको जानकारी दिए । सुरुमा जम्मा १ करोड रुपैयाँमा फिल्म सक्ने योजना थियो, तर निर्माण सम्पन्न हुँदासम्म बजेट ३ करोड पुग्यो । मौसमले साथ नदिँदा फिल्मको एउटा मात्रै दृश्य खिच्न २१ दिनसम्म लागेको रोचक तथ्य उनले सुनाए ।

कुराकानीको अन्त्यतिर हमालले एउटा रमाइलो तर गम्भीर प्रश्न सोधे, “यदि यो फिल्म असफल भएको भए के हुन्थ्यो ?” सिप्पीले मुस्कुराउँदै सटिक जवाफ दिए, “म आज यहाँ निफमा हुने थिइनँ !” निफको दोस्रो दिन बलिउड संवादमा मात्र सीमित रहेन । शुक्रबारबाटै महोत्सवमा रुसी र चिनियाँ फिल्महरूको विशेष प्रदर्शनी पनि सुरु भएको छ । फिल्म ‘अगस्ट’ को विशेष प्रदर्शनसँगै रुसी फिल्म महोत्सवको सुरुवात गरिएको छ

ठमेलस्थित छाया सेन्टरमा एक उद्घाटन कार्यक्रमका बीच चिनियाँ फिल्महरूको ‘सिजाङ प्यानोरोमा’ स्क्रिनिङ सुरु भएको छ । आयोजकका अनुसार शनिबार निफको तेस्रो दिनका गतिविधिहरू काठमाडौंका विभिन्न चार स्थानमा सञ्चालन हुनेछन् । सिभिल मल, छाया सेन्टर र रसियन हाउसमा विश्वभरका उत्कृष्ट फिल्महरूको स्क्रिनिङ हुनेछ भने नेपाल पर्यटन बोर्डको हलमा फिल्मसम्बन्धी विविध अन्तर्क्रियात्मक कार्यक्रमहरूलाई निरन्तरता दिइनेछ ।