इटहरी/ फिल्मका प्रमुख अभिनेताको ९० प्रतिशत दृश्यहरू सुटिङ सकिसक्दा उक्त मुख्य कलाकारलाई फिल्मबाट निकाल्नु र खिचिएका दृश्य फाल्नु निर्माण पक्षका लागि ठूलो घाटाको विषय हो । तर, गम्भीर नैतिक प्रश्न उठेपछि कालीरानी फिल्मसले त्यही कठोर निर्णय लिएको छ । अमेरिकामा रहेकी एक युवतीले लगाएको ‘बलात्कार’को गम्भीर आरोपसँगै चर्चित कलाकार सागर लम्साल बलेलाई निर्माणाधीन फिल्म ‘पाँच पाण्डव’बाट निष्कासन गरिएको छ ।
शुक्रबार सामाजिक सञ्जालमार्फत ती युवतीले एक वर्षअघि लम्सालले आफूमाथि बलात्कार गरेको दाबी गर्दै स्टाटस सार्वजनिक गरेकी थिइन् । यो गम्भीर आरोप बाहिरिनासाथ कालीरानी फिल्मस प्रालिले तत्काल आपतकालीन बैठक बसेको थियो । उक्त बैठकले नैतिकताको आधार देखाउँदै लम्साललाई फिल्मबाट हटाउने निर्णय गरेको हो । फिल्मका निर्माता नवीन श्रेष्ठका अनुसार, गत चैत २ गतेदेखि झापा र त्यस आसपासका क्षेत्रमा ‘पाँच पाण्डव’को छायांकन भइरहेको छ ।
जसमा आरोपित लम्सालको ९० प्रतिशत दृश्य खिचिसकिएको थियो । तर, शुक्रबार जारी गरिएको प्रेस विज्ञप्तिमा ती सबै खिचिएका दृश्यहरू फिल्ममा समावेश नगरिने स्पष्ट पारिएको छ । विज्ञप्तिमा भनिएको छ, “लम्सालको ९० प्रतिशत दृश्य खिचिसकिएको भएपनि उनी अब उप्रान्त पाँच पाण्डवको हिस्सेदार रहनेछैनन् । उनी संलग्न रहेका कुनै पनि दृश्य फिल्ममा समावेश हुने छैनन् भनी सम्पूर्ण नेपाली फिल्म क्षेत्र, समाजका प्रबुद्ध वर्ग र आम दर्शकसमक्ष प्रष्ट पार्न चाहन्छौं ।”
आर्थिक नोक्सानी सहेरै भए पनि नैतिकताको पक्षमा उभिएको फिल्म ‘पाँच पाण्डव’ परिवारले यस घटनाको गम्भीरतापूर्वक सत्यतथ्य छानबिन गर्न र जाँचबुझका लागि सम्बन्धित निकायसँग जोडदार मागसमेत गरेको छ ।
Discussion about this post