‘मेरो कविता’ पहिलो संस्करणको उपाधि सिक्किमका सोनामलाई

इटहरी/ काठमाडौंलाई मात्रै साहित्यको केन्द्र मान्ने परम्परालाई भत्काउँदै झापाको दमकमा सम्पन्न ‘मेरो कविता : द रिदम अफ पोइट्री’ सिजन-१ को भव्य उपाधि भारत सिक्किमका कवि सोनाम पाल्जोर तामाङले जितेका छन् । सोमबार झापाको दमकस्थित बेलडाँगीमा सम्पन्न ग्रान्ड फिनालेमा उत्कृष्ट प्रस्तुति दिँदै तामाङले प्रथम स्थान हासिल गरेका हुन् । उपाधिसँगै उनले नगद ३ लाख रुपैयाँ हात पारेका छन् ।

विश्वभरका २५० भन्दा बढी प्रतिस्पर्धीलाई उछिन्दै अन्तिम १० मा परेका स्रष्टाहरूबीच कडा प्रतिस्पर्धा भएको थियो । जसमा फर्स्ट रनरअप सुनसरीका प्रवेग हाङसोराङले १ लाख रुपैयाँ र सेकेन्ड रनरअप झापाका टोलीप्रसाद राजवंशील ७५ हजार रुपैयाँ जितेका छन् । थर्ड रनरअप इलाम फिदिमका शेशे थाम्सुहाङले ५० हजार रुपैयाँ हात पारे । ग्लोबल भुटनिज लिटरेचर अर्गनाइजेसनका अध्यक्ष पातलो अन्तरेले विजेताहरूलाई प्रदान गरिएको पुरस्कारबारे औपचारिक जानकारी गराएका थिए ।

कार्यक्रममा प्रमुख अतिथिको रूपमा उपस्थित नेपाल प्रज्ञा प्रतिष्ठानका कुलपति भूपाल राईले यो रियालिटी सोको खुलेर प्रशंसा गरे । उनले भने, “काठमाडौंलाई मात्र केन्द्र मान्ने जुन परम्परा थियो, ‘मेरो कविता : द रिदम अफ पोयट्री’ कार्यक्रमले त्यसलाई भत्काउन सफल भएको छ ।” नेपाली भाषामा कविता कोर्ने नवप्रतिभाहरूको खोजी र प्रवर्द्धन गर्ने मुख्य लक्ष्यका साथ ‘माई प्लेटफर्म’ले यो रियालिटी सोको निर्माण गरेको हो ।

गत मङ्सिर ९ गतेबाट डिजिटल अडिसन सुरु भएको यस कार्यक्रममा नेपाल लगायत विभिन्न देशका नेपालीभाषी कविहरूको उत्साहजनक सहभागिता रहेको थियो । यस रियालिटी सोको निर्देशन केवल क्षेत्रीले गरेका हुन् भने पवित्रा राईले सहायक निर्देशकको भूमिका निर्वाह गरेकी थिइन् ।

प्रतिस्पर्धाको मूल्याङ्कन नेपाली साहित्यका चर्चित अनुहारहरू कविद्वय हेमन यात्री र उत्तम तुम्सा लिम्बु, गजलकार सुमन स्मारिका र अज्ञात ददीको निर्णायक मण्डलले गरेको थियो ।
सञ्चारकर्मी सुमन कुरुम्बाङले निकै आकर्षक शैलीमा सञ्चालन गरेको यस ग्रान्ड फिनालेमा मनिकुमार क्षेत्रीले स्वागत मन्तव्य राखेका थिए । त्यसैगरी, आयोजकका अध्यक्ष पातलो अन्तरे, कोषाध्यक्ष शेखर कोइराला नेपाल र बेलडाँगी शिविरका सचिव सञ्चहाङ सुब्बाले कार्यक्रमको सफलताको शुभकामना व्यक्त गरेका थिए ।