अस्तित्वको खोजीमा चन्द्र: मण्डलामा मञ्चन भइरहेको छ नाटक ‘चन्द्रलाई कसले मार्यो?’

इटहरी/ “जब समाजले नाम र लिङ्ग तोकिदिन्छ, अनि प्रश्न जन्मिन्छ-म साँच्चै को हुँ?” यस्तै आत्मसन्देह र अस्वीकृतिको बीच आफूलाई खोजिरहन्छ एक पात्र चन्द्र । यही प्रश्न र संघर्षको भित्री यात्रा बोकेको नाटक ‘चन्द्रलाई कसले मार्यो ?’ गएको असार २५ गतेदेखि उत्साहका साथ मण्डला थिएटरमा मञ्चन भइरहेकाे छ ।

रंगकर्मी सन्दीप श्रेष्ठको लेखन, निर्देशन र परिकल्पनामा तयार भएको यस नाटकले एलजीबीटीक्विआई समुदायको जीवनमा गुज्रिने आत्म-संघर्ष, सामाजिक तिरस्कार, डिप्रेसन र आत्महत्या जस्ता गहिरा विषयलाई केन्द्रमा राखेको छ । ‘चन्द्र’ नामको पात्रको दृष्टिबाट समाज र सम्बन्धहरूलाई हेर्ने प्रयास नाटकको मूल आत्मा बनेको छ ।

बदलिँदो सम्बन्धको बनोट, अस्वीकृत पहिचानसँगको द्वन्द्व र आफूभित्रको अस्तित्व खोज्ने असहज यात्रा यसमा मार्मिक ढंगले प्रस्तुत गरिएको छ । भावना उप्रेती, सीता देवी तिमल्सेना, मिलन कार्की, मौसम खड्का, तेन्जु योञ्जन, प्रितिशा अधिकारी र किरण चापागाईंले संवेदनशील चरित्रहरूलाई जीवन्त अभिनयद्वारा प्रस्तुत गरेका छन् ।

@parikalanewsofficial

यही साउन १८ गतेसम्म चल्ने यो नाटक सोमबारबाहेक हरेक दिन साँझ ५:३० बजे तथा शनिबार दिउँसो १:३० बजे अतिरिक्त शोका साथ मञ्चन भइरहेको छ । ‘चन्द्रलाई कसले मार्यो?’ केवल नाटक मात्र होइन, यो एक समुदायको मौन कथा, बोल्न नसकेको चिच्याहट र अस्तित्व खोजीको सशक्त अभिव्यक्ति हो ।