सर्टफिल्म ‘निःशब्द’को फस्टलुक सार्वजनिक, नि:सन्तान जोडीको पीडादायी कथा

इटहरी/ नि:सन्तान दाम्पत्यको संवेदनशील कथालाई केन्द्रमा राखेर तयार पारिएको सर्ट फिल्म ‘निःशब्द’ को फस्टलुक पोस्टर सार्वजनिक गरिएको छ । कौतुहलता जगाउने उक्त पोस्टरमार्फत फिल्मले समाजमा व्याप्त एउटा गहिरो पीडालाई चित्रण गर्न खोजेको संकेत मिलेको छ । सेलिब्रेटी टाइम्सको ब्यानरमा बनेको फिल्ममा ओजस्वी विक्रम विष्ट, मिसेल घिमिरे र दिवस नाथको अभिनय देख्न पाइनेछ ।

फिल्मका लेखक, निर्देशक तथा निर्माता हुन् रामजी ज्ञवाली । छायांकन शंकल्प भुजेल, सम्पादन नहकुल खड्का, साउन्ड डिजाइन भरत कंडेल र कलर ग्रेडिङ राजेन्द्र मोक्तानको रहेको छ । फिल्म हाल पोस्ट-प्रोडक्सनको अन्तिम चरणमा रहेको निर्देशक ज्ञवालीले बताएका छन् । ज्ञवालीका अनुसार, फिल्म ‘निःशब्द’लाई च्यारिटी शोमार्फत दर्शकसमक्ष ल्याउने योजना रहेको छ भने यसलाई अन्तर्राष्ट्रिय फिल्म फेस्टिभलहरूमा पनि पठाइनेछ ।

युट्युबमा रिलिज गर्ने विकल्पलाई भने प्राथमिकता दिइएको छैन । उनले भनेका छन्, “पहिला फिल्मको सम्पूर्ण काम सकिएपछि दर्शकसामु ल्याउने तरिका तय गर्नेछौं । सर्ट फिल्ममा लामो फिल्मजस्तो समय हुँदैन, त्यसैले हामीले छोटो समयमा धेरै भन्न खोजेका छौं । दर्शकले ती कुराहरू महसुस गर्नेछन् ।” फिल्मले सन्तान नहुँदा पारिवारिक र सामाजिक दबाबले विवाहित जोडीले भोग्नुपर्ने मानसिक पीडा, मौनता र विवशता झल्काउने निर्माण टिमको भनाइ छ ।

@parikalanewsofficial

निर्देशक ज्ञवाली भन्छन्, “यो फिल्मले भावनात्मक रूपमा दर्शकलाई छुनेछ र समाजलाई सोच्न बाध्य पार्नेछ।” रामजी ज्ञवालीले यसअघि ‘रित्तो गाउँ’, ‘लापत्ता सन्तान’ र डकुड्रामा ‘मौन’ निर्माण गरेका छन्, जसले प्रदर्शनको पर्खाइ गरिरहेका छन् । विशेषगरी ‘रित्तो गाउँ’ ले राष्ट्रिय तथा अन्तर्राष्ट्रिय अवार्डहरू जितिसकेको छ र विभिन्न फिल्म फेस्टिभलहरूमा पनि प्रदर्शन भइरहेको छ । एक दशक लामो पत्रकारिता यात्रा पछाडि फिल्म निर्देशनमा होमिएका ज्ञवालीले ‘डार्कमुन’, ‘एक लभर’, ‘हनिमुन’, ‘आराध्या’ र ‘लिलामी’ लगायत चर्चित म्युजिक भिडियो निर्देशन गरिसकेका छन् ।