‘मोहर’ ट्रेलरमा प्रेम, पीडा र परम्पराको गहिरो कथा, साउन २३ गतेबाट प्रदर्शन हुँदै

इटहरी/ नेपाली समाजमा गहिरिएर बसेको देउकी प्रथालाई मुख्य विषयवस्तु बनाउँदै तयार पारिएको फिल्म ‘मोहर’ आगामी साउन २३ गतेबाट देशव्यापी प्रदर्शनमा आउँदैछ । प्रदर्शन मिति नजिकिँदै गर्दा फिल्म यूनिटले ट्रेलर सार्वजनिक गरेको छ । सामाजिक यथार्थ, प्रेम र पीडाको कथा बोकेको यो फिल्म ओम प्रतिकको लेखन तथा निर्देशनमा तयार भएको हो ।

फिल्म मेकर्स प्रा.लिको व्यानरमा बनेको फिल्मका निर्माता चुम्बन जंग शाही हुन् । सार्वजनीक ट्रेलरमा अभिनेता पल शाह, नायिकाद्वय बेनिशा हमाल र नीति शाहको प्रेम सम्बन्ध, सामाजिक परम्परा र विद्रोहको कथा प्रस्तुत गरिएको छ । साथमा लक्ष्मी गिरी, अर्जुन जंग शाही, बाल कलाकार सारा शर्मा लगायतका कलाकारको सशक्त अभिनय देख्न सकिन्छ । हेर्नुस् ट्रेलर ।

ट्रेलरले एक बालिकालाई देउकी चढाउने कथाबाट सुरू भएर सामाजिक संघर्ष र प्रेमका आरोह-अवरोह समेटेको छ । पल शाहको भूमिका बेनिशा र नीतिसँगको सम्बन्धमार्फत द्वन्द्वपूर्ण देखिन्छ भने, देउकी प्रथाविरुद्धको प्रतिवाद र पीडाको भावनाले ट्रेलरलाई संवेदनशील बनाएको छ । पहिले नै चर्चामा रहेका दुई गीत र टिजरपछि ट्रेलरले दर्शकमा फिल्मप्रतिको कौतुहलता झनै बढाएको छ ।

ट्रेलर हेर्दा लाग्छ-‘मोहर’ले एकैसाथ मनोरञ्जन, सामाजिक सन्देश र भावनात्मक गहिराइ दिनेछ । फिल्ममा मिथिला शर्मा, रविन्द्र झा, मिस पबी, सुशिल देवकोटा, लक्ष्मीनाथ तिमिल्सिना, सिद्धार्थ सिंह, माधव दत्त पण्डित, गीता थापा, नविन खतिवडा, अर्जुन आचार्य लगायत कलाकारको समेत मुख्य भूमिका रहेको छ । फिल्मको दृश्यांकन दीपेन बस्न्यातले गरेका हुन् ।

@parikalanewsofficial

यो फिल्मको सम्पादन भूपेन्द्र अधिकारीले, कलर रेनिश फागोले, र संगीत सुरेश अधिकारी, थानेश्वर गौतम र एसडी योगीले गरेका छन् । ट्रेलर साहिल खानले तयार पारेका हुन् । फिल्मका कोरियोग्राफर रामजी लामिछाने र कविराज गहतराज हुन् भने एक्सन डिजाइन कुमार महर्जनको रहेको छ । सहायक निर्देशक गिरिराज घिमिरे र प्रोडक्सन म्यानेजर लक्ष्मणराज पौडेल रहेका छन् । ‘मोहर’ शीर्षक नै कथाको आत्मा बनेको ट्रेलरले फिल्मप्रतिको उच्च आशा बोकेको छ । बक्स अफिसमा समेत यसले सुखद नतिजा ल्याउने अपेक्षा गरिएको छ ।