इटहरी/ नेपाली श्रमिकको कथा बोकेको फिल्म ‘रियाल रिङ्गेट’ श्रावण १६ गतेदेखि प्रदर्शनमा आउन लाग्दा निर्माण पक्षले प्रचारप्रसार लाई तिब्रता दिएको छ । यतिबेला निर्देशक विभोर पोखरेलको टोली काठमाण्डौका क्याम्पस–क्याम्पस चहार्दै कविताको भाव र गीतको लयमार्फत दर्शक–विशेषगरी युवाहरूको मन जित्न खटिएको छ ।
बिनायक सिद्ध कलेज, द इनसाइट भिजन एसएस कलेज, साइपाल एकेडेमी लगायतका शिक्षण संस्थामा पुगेर प्रचार गरिएको यो अभियानमा निर्देशक पोखरेलसँगै गायक रामचन्द्र काफ्ले, लोकप्रिय कवि नाथन रायन, कलाकार प्रमोद चौलागाईं, सीमा केसी, सन्दीप तामाङ, सुवास थापा मगर र विशाल थापा सहभागी छन् । फिल्मको प्रचारमा प्रयोग भएको शैलीले नै यसलाई अरूभन्दा पृथक बनाउँछ । कवि रायनले आफ्नै सिर्जनाका कविता वाचन गर्दा गायक काफ्लेले ती कवितामा संगीत मिसाएर सजीव बनाइदिन्छन् । यिनै माध्यममार्फत विद्यार्थीहरूसँग प्रत्यक्ष संवाद गरिँदै फिल्मको भावनात्मक पक्ष उजागर गरिँदैछ ।
विशेष कुरा के छ भने, कवि रायनले फिल्मकै लागि लेखेका केही कविता फिल्ममै समावेश गरिएका छन्, जसले नेपाली फिल्ममा कविता विधाको प्रयोगप्रति एक किसिमको प्रयोगात्मक साहस देखाएको छ । यसैबीच सार्वजनिक भएको ट्रेलरले भने फिल्मको मूल सन्देशलाई अझ प्रष्ट बनाएको छ, वैदेशिक रोजगारीमा गएका नेपालीको जीवनयात्रा, पीडा र अभावलाई उठान गरिएको छ ।
@parikalanewsofficial
निर्देशक पोखरेलका अनुसार फिल्मले वास्तविक श्रमिकको आवाजलाई पर्दामा बोल्न खोजेको हो । ‘रियाल रिङ्गेट’ मा प्रमोद चौलागाईं, निता ढुंगाना, छुल्ठिम डोल्मा गुरुङ, रवीन्द्र खड्का, ध्रुव कोइरालालगायतका कलाकारको अभिनय रहेको छ भने संगीतको जिम्मा रामचन्द्र काफ्ले, किरण तुलाधर र चन्दन ध्वज केसीले सम्हालेका छन् । फिल्मको नामले नै कतार, साउदी अरब, मलेसिया जस्ता मुलुकतर्फ संकेत गर्दै श्रमिक जीवनको तीतो यथार्थ प्रस्तुत गर्न खोजेको छ ।
Discussion about this post