आजबाट ‘महारानीको जात्रा’, उषा रजक र राज न्यौपाने सहित नयाँ अनुहार

इटहरी/ रंगमञ्चमा ‘डेब्यु’ तथा ‘कमब्याक’ गराउँदै दुई सफल नाटकको मञ्चनपछि कान्तिपुर फिल्म एकेडेमीको नाटकघर, कान्तिपुर थिएटरले आफ्नो तेस्रो नाटक ‘महारानीको जात्रा’ आजबाट मञ्चन सुरु हुँदैछ । रेखा थापालाई रंगमञ्चमा डेब्यु गराएको ‘मीरा’ र लामो अन्तरालपछि नायक जीवन लुइँटेललाई कमब्याक गराएको ‘शिरीषको फूल’ को अपार सफलता र चर्चाका कारण कान्तिपुर थिएटरको यो नयाँ नाटकप्रति रंगकर्मी, दर्शक र फिल्म क्षेत्रको चासो झनै बढेको छ ।

अघिल्ला दुई नाटकका क्रममा थिएटरमा नयाँ दर्शक, फिल्मकर्मी, कलाकार र पत्रकारहरूको उत्साहजनक उपस्थिति देखिएको थियो, जसले गर्दा रंगमञ्च अझ फराकिलो र व्यावसायिक बन्दै गएको विश्वास रंगकर्मीहरूको छ । यसपटक ‘महारानीको जात्रा’मा कान्तिपुर थिएटरले फिल्म र रंगमञ्चकी अनुभवी अभिनेत्री उषा रजक र राज न्यौपानेसँगै नव-अभिनेत्रीहरू सुहाना आचार्य र निकीता आचार्य लाई मञ्चमा उतार्दैछ ।

लामो समयदेखि नाटक डिजाइन र निर्देशनमा सक्रिय अनुभवी रंगकर्मी तथा प्रशिक्षक दिपल बरालले यस नाटकको परिकल्पना तथा निर्देशन गरेका हुन् । रेमश पुरीको निर्माणमा बन्ने यस नाटकमा दिपेश गजुरेल, विकल्प ओली, ज्योति लामा, समीर शर्मा, विशाल कार्की, गोविन पौडेल, श्रीधर गौतम, प्रयास खत्री, बिमल यादव, मनोज तामाङ, बिरान दहनी, स्वेता चौलागाईं र कुशल बास्कोटा लगायतका कलाकारहरूले अभिनय गर्नेछन् ।

यी सबै कलाकारहरू कान्तिपुर फिल्म एकेडेमी र थिएटरका विद्यार्थी तथा सदस्य हुन् । ‘महारानीको जात्रा’ आज अर्थात् कात्तिक २४ गतेदेखि मंसिर २० गतेसम्म कान्तिपुर फिल्म एकेडेमी, गैह्रीधारामा मञ्चन हुनेछ । बुधबार बाहेक हरेक साँझ ५ बजे यो नाटक मञ्चन हुने जनाईएको छ । विद्यार्थी तथा रंगकर्मीका लागि: रु ३०० र साधारण दर्शकका लागि रु ५०० प्रवेश शुल्क निर्धारण गरिएको छ ।

@parikalanewsofficial