इटहरी/अभिनेता दयाहांग राईको नाम नसुन्ने, नचिन्ने सायदै कम छन् । उनको यतिबेला कुनै फिल्म छायांकन भैरहेका छन्, कुनै प्रदर्शन भैरहेका छन् त कुनैको पोस्टर सार्वजनिक भैरहेका छन् । यहि मौकामा गतवर्ष सार्वजनिक प्रदर्शनमा आएको उनि अभिनित फिल्म ‘२ नम्बरी’ युट्युबमा सार्वजनिक भएको छ । कुनै बेला आर्यन सिग्देलको डान्स भिडियोमा साईड रोलमा डान्स गरेका उनले अहिले भने सबै कलाकारलाई साईड लगाएका छन् भन्दा फरक नपर्ला ।
एकपछि अर्को गर्दै हिट फिल्म दिएका उनि अहिलेको सबैभन्दा व्यस्त अभिनेता हुन् । संघर्षले सफलता दिलाउछ भन्ने भनाईको एक ज्वलन्त उदाहरण बनेका राई आफ्नो अभिनय, राम्रो ब्यबहार तथा बिभिन्न गुणले पूर्ण उनि सबैमाझ अतिनै रुचाएका अहिलेका लोकप्रिय कलाकार हुन् । २ नम्बरी युट्युबमा सार्वजनिक भएको ३ दिनमै युट्युब नेपाल ट्रेण्डिङ्गको पहिलो नम्बरमा पुगेको छ भने ३५ लाख भन्दाबढी पटक हेरिएको छ। सिनेमा हलमा रिलिजका बेला औसत ब्यापार गरेको यो फिल्मले युट्युबमा दर्शकको सकारात्मक प्रतिक्रिया बटुलिरहेको छ ।
दिपेन्द्र लामाको कथा तथा निर्देशन रहेको यस फिल्ममा सबैको मनको भाव, सामाजिक, राजनीतिक, आर्थिक, भौगोलिक तथा आफ्नो मौलिकता झल्किने छुट्टै सन्देश बोकेको छ । यसमा यति मात्र नभएर प्राकृतिक सुन्दरताको दृश्यको साथै जंगली प्राणीलाई पनि स्वतन्त्र रुपले बाच्न दिनुपर्छ भन्ने सन्देश दिइएको छ । दिपेन्द्र निर्देशित ‘नाङ्गो गाउँ’ ले यतिबेला ब्लकबस्टर ब्यापार गरिरहेको छ । नाङ्गो गाउँमा पनि दयाहांग नै प्रमुख भूमिकामा छन् ।
दिपक मनांगे ‘राजिव गुरुङ’, अमला देवी राई, जयश श्रेष्ठले निर्माण गरेको यस फिल्ममा दयाहांगको अलावा सौगात मल्ल, उग्येन चोडेन, उपासना सिंह ठकुरी, बुद्धि तामांग, पुस्कर गुरुङ, श्रेयष पौडेल, शारदा गिरि, कविता आले, प्रकाश घिमिरे, सुष्मा निरौला, बिश्वास गुरुङ, डी. बि गुरुङ, स्व. जयनन्द लामा, राजु थापा मगर, सागर शाह ठकुरी, सतिश सिंह खत्री, गणेश बस्याल, राज कुमार राई आदि कलाकारहरुको अभिनय रहेको छ ।
२ नम्बरी फिल्मको गीतमा जयन जे वाईवा र भुषण खतिवडाको शब्द र उनकै संगीत रहेको गीतमा मेलिना राई, जयन जे वाईवा र भुषण खतिवडाको स्वर सुन्न सकिन्छ भने रामजी लामिछानेको कोरियोग्राफी रहेको छ । बुढा सुब्बा डिजिटल प्रा. लि. बाट सार्वजनिक भएको ‘२ नम्बरी’ लाई सुशन प्रजापतिले छायांकन गरेका छन् भने निमेष श्रेष्ठको सम्पादन रहेको छ ।
Discussion about this post