‘मिसेस पुर्बेली आइकन’ प्रतिष्पर्धी दिपिकाको बिहेअघिको सपना विवाहपछि पूरा हुँदै

इटहरी/ ओपन स्पेस प्रालीको आयोजनामा इटहरीमा जारी ‘मिसेस पुर्बेली आइकन २०२४’ सौन्दर्य प्रतियोगितामा दिपिका भट्टराई एक प्रमुख प्रतिष्पर्धीको रूपमा उभिएकी छिन् । उनिसंगै यो प्रतियोगितामा ८ जना फाईनल प्रतिष्पर्धी छन् । यतिबेला उनिहरुलाई सुभेक्षा कार्कीले कोरियोग्राफी गराईरहेकी छन् भने यसका अतिरिक्त बौद्धिक तथा व्यक्तित्व विकासका ज्ञानहरु पनि आयोजकले प्रदान गरिरहेको छ । सौन्दर्यसँगै विवाहित महिलाहरूको बौद्धिक क्षमता र अपूर्ण सपना पूरा गराउने उद्देश्यका साथ आयोजना गरिएको यो प्रतियोगितामा दिपिका धनकुटादेखी प्रतिष्पर्धामा होमिएकी हुन् । धनकुटा घर भएकी उनि लामो समयदेखी बैंकको जागिरे हुन् ।

बुबा हरि प्रसाद भट्टराई र आमा मीना भट्टराईको कोखबाट उनको जन्म विराटनगरमा भएको हो । सामान्य परिवारमा हुर्केकी दिपिका सानैदेखि मिहिनती र लगनशील थिइन् । बाल्यकालदेखि नै दीक्षित भएर कालो टोपी लाउने सपना थियो उनको । जसले उनलाई अध्ययनप्रति गहिरो लगाव राख्न प्रेरित गर्‍यो । दिपिका सधैं अध्ययनमा अगाडि रहिन् र स्नातकोत्तर (MBA) सम्मको पढाई समेत पूरा गरिन् । सरल स्वभाव र ज्ञानप्रति आकर्षित रहेकी दिपिकाले बाल्यकालमा सधैं बुद्धिमान र परिपक्व बन्ने लक्ष्य राखिन् । उनी किशोरावस्थामा रहँदा पढाइलाई निरन्तरता दिइरहेकी थिइन् ।

स्नातक तहको अध्ययन गर्दै गर्दा उनको विवाह भयो, तर यसले उनको शिक्षा र करियरप्रतिको प्रतिबद्धतामा कुनै नकारात्मक प्रभाव भने नपरेको बताउँछिन् । सधैं परिवारको सल्लाहमा अघि बढेकी उनले विवाहपछि पनि आफ्नो जागिरलाई निरन्तरता दिइरहेकी छन् । श्रीमान विक्रम पौडेलसंग २०७२ सालमा २ पक्षको परिवारको सल्लाह बमोजिम मागी विवाह भएपछि पनि दिपिकाले आफ्नो सपना र उद्देश्यलाई बिर्सिनुपरेन । श्रीमान् र परिवारको समर्थनले उनले आफ्नो हरेक निर्णयलाई सहज रूपमा अगाडि बढाउन सफल भएको बताउँछिन् । उनी भन्छिन्, ‘मेरा हरेक निर्णयमा श्रीमान्, परिवार र माइतीको पुर्ण समर्थन रहेको छ।’ हेर्नुस् उनीसंग गरिएको कुराकानीको भिडियो ।

विवाहअघि कुनैपनी सौन्दर्य प्रतियोगितामा सहभागी भएको अनुभव नभएपनी विवाहपपस्चात अहिले ‘मिसेस पुर्बेली आइकन २०२४’ मा सहभागी भएपछि उनले आफ्नो व्यक्तित्वमा धेरै नै परिवर्तन आएको बताएकी छन् । विशेषगरी, सार्वजनिक रूपमा बोल्न पहिला जस्तो गाह्रो नभएको उनी बताउँछिन् । दिपिकाले विवाहअघि देखेका सपना विवाहपछि पूरा गर्न सकेको सुनाईन् । जसको लागि उनले आफ्नो परिवारलाई विशेष धन्यवाद समेत दिएकी छन् भने यो प्रतियोगितामा सहभागी भएसँगै साथीहरू, परिवार र माइतीबाट पनि राम्रो प्रतिक्रिया पाएको उनले बताइन् ।

यो हारजित हुने कार्यक्रम हो, जित्नु नजित्नु अलग कुरा हो । फाईनलमा अवस्य सहि निर्णय हुन्छ । तर, यहाँसम्म आइपुग्नुलाई पनि उनले जित सरह ठानेकी छन् । यदि यो प्रतियोगिता उनले नजितेपनि यहाँ सिकेका व्यक्तित्व विकासका सीपहरूलाई अनि नयाँ साथीहरूसंग लिएको अनुभवलाई जीवनभर साथमा लिएर अघि बढ्ने उनको भनाई छ । यदि प्रतियोगिता जितेको खण्डमा भने आफु विवाहित महिलाहरूको लागि प्रेरणाको स्रोत बन्ने र अन्य महिलालाई पनि आफ्ना सपना पछ्याउन प्रोत्साहित गर्ने लक्ष्य राखेको बताइन् । दिपिका भट्टराईको जीवन यात्रा केवल एउटा प्रतियोगितासम्म सीमित छैन । यो आत्मविश्वास, पारिवारिक समर्थन र सपना पूरा गर्ने चाहनाको प्रतिरूप हो । जसले उनलाई अन्य महिलाहरूको लागि प्रेरणा बनाएको छ ।