इटहरी/ राजेशपायल राई, मेलिना राई, बेनिसा पौडेल, र समीर खरेलको स्वर रहेको ‘फुलको वासनासरि’ बोलको गीत तथा भिडियो सार्वजनिक गरिएको छ । नेपाल प्रहरीका प्रवक्ता दानबहादुर कार्कीले लेखेको यो गीतले प्रहरी संगठनको भित्री भावना र समर्पणलाई उजागर गरेको छ । गीतको संगीत चर्चित संगीतकार दीपक शर्माले तयार पारेका छन् ।
गीतको भिडियोमा रमेश उप्रेती, प्रियंका कार्की, प्रकाश सपुत र बेनिसा पौडेलले प्रहरीको चरित्रमा अभिनय गरेका छन् । उनीहरूका भूमिका प्रहरीको पेशागत जीवनमा आइपर्ने कठिनाइ र चुनौतीहरूलाई चित्रण गर्ने उद्देश्यले तयार पारिएको छ । निर्देशक गम्भीर बिष्टको निर्देशनमा बनेको भिडियोको कथा र कन्सेप्ट सरोज ओलीले लेखेका हुन् । हेर्नुस् भिडियो ।
पवन सुसलिङको छायाङ्कन र सम्पादनले भिडियोको कलात्मक पक्षलाई थप उचाइमा पुर्याएको छ भने श्यामश्वेत रसाइलीको एरेन्जले गीतको भावलाई प्रभावकारी बनाएको छ । प्रवक्ता कार्कीका अनुसार ‘फूलको वासना सरी’ गीतले प्रहरीका अव्यक्त पीडा, उनीहरूको सेवामा खटिने चाहना र राष्ट्रप्रतिको समर्पणलाई चित्रण गरेको छ ।
हिमालदेखि तराईसम्म प्रहरीको सेवाको भावना गीतमार्फत व्यक्त गरिएको छ । “यो गीतले जनताको सेवामा खटिने प्रहरीका भावना, दुःख र जिम्मेवारीलाई देखाउन खोजेको छ,” कार्की भन्छन् । गीतले प्रहरी संगठनको भित्री संसारलाई झल्काउने प्रयास गर्दै उनीहरूको भूमिकालाई नयाँ ढङ्गले प्रस्तुत गरेको छ । जसले प्रहरी र नागरिकबीचको सम्बन्धलाई अझै मजबुत बनाउन मद्दत पुर्याउने विश्वास लिइएको छ ।
Discussion about this post