इटहरी/ हरितालिका तीजको अवसर पारेर नेपाली फिल्म ‘नाङ्गो गाउँ’ युट्युबमा सार्वजनिक गरिएको छ । बुढा सुब्बा डिजिटलको युट्युब च्यानलमार्फत यो फिल्मलाई दर्शकहरूको लागि निःशुल्क रूपमा उपलब्ध गराइएको हो । यो फिल्मलाई दीपेन्द्र लामाले निर्देशन गरेका हुन् । फिल्मले हल रिलिजका बेला ५१ औं दिन मनाउन सफल भएको थियो भने व्यापारिक सफलता समेत हासिल गरेको थियो । ‘नाङ्गो गाउँ’ फिल्ममा गाउँमा हुने राजनीतिक चलखेल र तिनले निम्त्याउने समस्याहरूलाई जीवन्त तरिकाले पर्दामा उतारिएको छ ।
यो फिल्मलाई युट्युबमा पनि रुचाईएको छ । यो समाचार तयार गर्दैगर्दा सार्वजनिकको २ दिनको अवधिमा फिल्मलाई २९ लाख पटक हेरिएको छ भने युट्युब ट्रेण्डिङ्ग नेपालको पहिलो स्थानमा उक्लिएको छ । यता १ लाख ४५ हजार बढिले लाईक गरेका छन् भने ४ हजार बढि सकारात्मक प्रतिक्रिया फिल्मले पाएको छ । यो फिल्मको निर्माता हिलाम कडरिया हुन् भने कार्यकारी निर्माताको रुपमा रामहरि श्रेष्ठ र जय श्रेष्ठ रहेका छन् । फिल्मको कथा र संवाद स्वयं निर्देशक लामाले लेखेका हुन् । हेर्नुस नाङ्गो गाउँ पुरा फिल्म
फिल्ममा दयाहाङ राई, मिरुना मगर, साम्राज्ञी राज्यलक्ष्मी शाह, कर्मा शाक्य, बुद्धि तामाङ, रविन्द्र झा, विशाल पहारी, शिशिर वाङ्देल लगायतका कलाकारहरूले मुख्य भूमिकामा अभिनय गरेका छन् । दयाहाङ राई र मिरुना मगरको जोडीले गाउँका जनजीवन र त्यहा भइरहेका राजनीतिक संघर्षलाई आफ्नो पात्रहरूको माध्यमबाट प्रभावकारी रूपमा चित्रण गरेका छन् । ‘नाङ्गो गाउँ’ गत वर्षको २९ भदौमा प्रदर्शन गरिएको थियो । राजनीतिक विषयवस्तुलाई व्यंग्यात्मक तरिकाले प्रस्तुत गरिएको यो फिल्म केही समयअघि ओटीटी प्लेटफर्म कान्तिपुर सिनेमाजमा पनि उपलब्ध गराइएको थियो ।
Discussion about this post