एलिना चौहान उत्कृष्ट तीज गायिका हुँदा उत्कृष्ट तीज गीत मोडल महिलातर्फ कविता न्यौपाने

इटहरी/ छायाँछवि क्रियशनद्वारा आयोजित ११औं संस्करणको तीज म्यूजिक अवार्ड २०८१ भव्य रूपमा सम्पन्न भएको छ । कार्यक्रमले मौलिक तीज गीतको गायिका र उत्कृष्ट तीज गायिकातर्फ एलीना चौहान र शोभा पाण्डेलाई सम्मानित गर्‍यो । एलीना चौहानले आफ्नो लोकप्रिय गीत ‘गम्कीदे मादलु’ बाट उत्कृष्ट मौलिक तीज गायिकाको अवार्ड जितिन् भने शोभा पाण्डेले ‘हरदनि पूजा गर्छु म’ बाट उत्कृष्ट तीज गीत गायिकाको पुरस्कार प्राप्त गरिन् । जुरी अवार्ड भने बिन्दु बिसीले ‘रातो टिकैमा’ गीतबाट जित्न सफल भइन् ।

यस्तै मौलिक तीज गीतको लय विधामा प्रेम सापकोटा सोनुले ‘काली पसमकी डोरी कसम’ गीतका लागि अवार्ड हात पारेका छन् । यस गीतका मोडलतर्फ स्मारिका ढकालले उत्कृष्ट मौलिक तीज मोडलको उपाधि जितिन् । त्यस्तै, उत्कृष्ट तीज गीत मोडल (महिला) विधामा कविता न्यौपानेले ‘नाँच मायाले’ गीतका लागि अवार्ड पाएकी छिन् । जुरी विधामा शीला गजुरेलले ‘तीजको उमङ्ग’ गीतबाट उत्कृष्ट तीज मोडल (महिला) अवार्ड जितिन् ।

यस वर्षदेखि दिवंगत चर्चित मोडल दिपाशा बिसीको स्मृतिमा छायाँछवि क्रियशनले स्थापना गरेको ‘छायाँछवि दिपाशा स्मृति पुरस्कार’ पहिलो पटक प्रदान गरियो । यो प्रतिष्ठित पुरस्कार चर्चित मोडल तथा म्यूजिक भिडियो कलाकार संघकी प्रथम अध्यक्ष अञ्जु निरौलालाई प्रदान गरियो । यो सम्मान एघार हजार एक सय एघार रुपैयाँको नगद पुरस्कार, दोसल्ला र सम्मानपत्र सहित प्रदान गरिएको थियो । ११औं संस्करणको छायाँछवि तीज म्यूजिक अवार्डले आफ्नो क्षेत्रमा उल्लेखनीय योगदान दिएका व्यक्तिहरूलाई समेत सम्मानित गर्‍यो ।

मोडल सिम्रन दुलाल कुसुम, पत्रकार बर्षा खनाल, गायिका बबिना भट्टराई, बरिष्ठ सौन्दर्यविद् चुनु थापा र लोक गायिका सञ्जु न्यौपानेलाई छायाँछवि तीज नारीबाट सम्मान प्रदान गरियो । छायाँछवि क्रियशनका अध्यक्ष शान्तिप्रियका अनुसार यी व्यक्तिहरूले आफ्नो क्षेत्रमा अद्वितीय योगदान पुर्‍याएका कारण सम्मान गरिएको हो ।कार्यक्रममा तीजसम्बन्धी सांस्कृतिक प्रस्तुति आकर्षणको केन्द्र बन्यो । गायिका साहिमा श्रेष्ठ र अञ्जु श्रेष्ठले कार्यक्रमलाई गायन प्रस्तुतीले रोचक बनाए भने, मोडल अश्मिता पुरी, निकिशा श्रेष्ठ र सूर्योदय डान्स स्टूडियोले नृत्य प्रस्तुति दिएका थिए ।

जुरी प्यानलमा गीतकार कृष्णादेवी आचार्य रोशनी, गायक भीम लिम्बु, गीतकार गोबिन्द भट्ट र पत्रकार दीपज्योति थापा रहेका थिए । यो कार्यक्रमको सञ्चालन दीपज्योति थापाले गरेकी थिइन् । कार्यक्रमको सल्लाहकारको रुपमा भुवन चन्द, बसुन्धरा भूषाल, चैत्यदेवी र देवीका बन्दना उपस्थित रहेका थिए । त्यस्तै, विशेष अतिथिहरूमा नेपाल चलचित्र कलाकार संघका अध्यक्ष मोहन निरौला, चलचित्र पत्रकार संघका अध्यक्ष समीर बलामी, लोक दोहोरी प्रतिष्ठानका पूर्व अध्यक्षद्वय दुर्गा रायमाझी र चन्द्र शर्मा, साहित्यकार दामोदर पुडासैनी, कलाकार उत्तम केसी, अभिनेत्री एवं मोडल जेबिका कार्की लगायत विभिन्न सांस्कृतिक र चलचित्रकर्मीहरूको उपस्थिति रहेको थियो ।

अवार्ड विजेताहरूको सूची:

-उत्कृष्ट तीज गीत एरेञ्जर: विनय कार्की क्षेत्री (तिमी म नाचौं)
-उत्कृष्ट तीज गीत ध्वनी मिश्रण: प्रकाश मिश्र (उनकै नाममा)
-उत्कृष्ट तीज गीत छायाँकार: मुकेश हुमागाई (के लाई पीर लीन्छौ)
-उत्कृष्ट तीज गीत सम्पादक: वीरेन्द्र भाट विपिन (रातो टिकैमा)
-उत्कृष्ट तीज गीत नृत्य निर्देशक: सुरेन्द्र वसेल (तीजको उमङ्ग)
-उत्कृष्ट तीज गीत निर्देशक: श्रीजन बराल (नाँच मायाले)
-उत्कृष्ट तीज मोडल (पुरुष): राहुल श्रेष्ठ (हवाइ जहाज चडेर)
-उत्कृष्ट तीज मोडल (महिला): कविता न्यौपाने (नाँच मायाले)
-मौलिक तीज मोडल: स्मारिका ढकाल (काली पसमकी)
-उत्कृष्ट तीज दोहोरी गीत गायक: राजेश बर्देवा (नाच छम्म छम्म)
-उत्कृष्ट तीज दोहोरी गीत गायिका: अञ्जना सरु (तिमी म नाचौं)
-उत्कृष्ट तीज गीत शब्द: सुमन बैरागी पण्डित (आएन परदेशी)
-उत्कृष्ट मौलिक तीज गीत शब्द: लोकराज अधिकारी (गम्कीदे मादलु)
-उत्कृष्ट तीज गीत लय: शुकदेव अधिकारी (नाँच मायाले)
-उत्कृष्ट मौलिक तीज गीत लय: प्रेम सापकोटा सोनु (काली पसमकी)
-उत्कृष्ट तीज नव गायिका: संजीता खड्का (बालेनको शहर)
-उत्कृष्ट तीज गीत गायिका: शोभा पाण्डे (हरदनि पूजा गर्छु)
-उत्कृष्ट मौलिक तीज गायिका: एलीना चौहान (गम्कीदे मादलु)