कम्बोडियामा हुने ‘मिस प्लानेट २०२४’मा नेपालको प्रतिनिधित्व गर्दै अनिसा पराजुली

इटहरी/ नेपालकी अनिसा पराजुली कम्बोडियामा हुने ‘मिस प्लानेट २०२४’ प्रतियोगितामा नेपालको प्रतिनिधित्व गर्ने भएकी छिन् । यो प्रतियोगिता नोभेम्बर १९ देखि २७ सम्म सञ्चालन हुनेछ भने अनिसा १८ नोभेम्बरमा कम्बोडियाको लागि उड्नेछिन् । प्रतियोगिताको तयारीस्वरूप उनले हाल विभिन्न तालिमहरू लिइरहेकी छिन्, जहाँ उनले ‘नेसनल कस्ट्युम’को लागि बुद्धको थिमलाई रोजेकी छन् । बौद्ध धर्मावलम्बीहरूको बाक्लो उपस्थिति भएका कारण उनले बुद्धको थिम छनोट गरेको बताइन् ।

अनिसाले यो प्रतियोगितालाई नेपालको नाम विश्वभर फैलाउन एक महत्वपूर्ण अवसरका रूपमा लिएकी छिन् । यस अवसरलाई अधिकतम लाभदायक बनाउन आफूले सक्दो प्रयास गर्ने योजना उनले बनाएकी छन् । यस वर्षको ‘मिस प्लानेट’को थिम ‘दिगो विकास र मानसिक स्वास्थ्य जागरुकता’ रहेको छ, जुन उनको पेशागत क्षेत्रसँग सम्बन्धित छ ।

अनिसा पेशाले मानसिक स्वास्थ्य नर्स हुन् र उनी हाल वीर नर्सिङ क्याम्पसमा माष्टर अध्ययनरत छिन् । नेक्स्ट मोडल्स नेपालका सिइओ रवि धमलाका अनुसार आफ्नो पेशागत अनुभव र ज्ञानका कारण अनिसाले यो प्रतियोगितामा राम्रो प्रदर्शन गर्न सक्छिन् । अनिसा यसअघि ‘मिस नेपाल पिस’ प्रतियोगितामा फस्ट रनरअप बन्न सफल भएकी थिइन् । जसका कारण नै उनले ‘मिस प्लानेट २०२४’मा नेपालको प्रतिनिधित्व गर्ने अवसर पाएकी हुन् ।