फिल्म ‘बलिदान’ छायांकन सुरु, सम्पुर्ण छायांकन कोशी प्रदेशमा हुने

इटहरी/ नेपाली फिल्म ‘बलिदान’को छायाङ्कन हरितालिका तीजको अवसरमा प्रविधि पूजासँगै सुरु भएको छ । मोरङको सुन्दरहरैंचामा अवस्थित पाथीभरा माताको मन्दिरमा शुक्रवार पूजा सम्पन्न भएसँगै यस फिल्मको औपचारिक शुभारम्भ गरिएको हो । फिल्मको पहिलो दृश्य शनिवार मोरङको इटहरीमा छायाङ्कन गरिनेछ, जहाँ अभिनेत्री ऋचा शर्मा र केही बाल कलाकारहरूको सहभागिता रहनेछ ।

निर्देशक सन्तोष सेनका अनुसार आगामी केही दिनमै प्रमुख कलाकारहरू समीर भट्ट, अर्पण थापा, सौगात मल्ल र दिव्य देवलगायतको छायाङ्कन सुरु हुनेछ । उनले ‘बलिदान’लाई निर्माण गर्न प्रि-प्रोडक्सनका क्रममा लामो समयदेखि गरिएको तयारी, अनुसन्धान र अथक परिश्रमलाई उल्लेख गरे । उनले भने, ‘हामीले आज प्रविधि पूजा गर्दै चलचित्रको प्रोडक्सन सुरु गरेका छौँ । नेपाली र भारतीय प्राविधिकहरूको समायोजनमा यो महत्त्वपूर्ण परियोजना अघि बढ्न लागेको छ।’

फिल्म ‘बलिदान’को कथा नेपालको माटोमाथि भइरहेको अन्याय, अत्याचार र सामाजिक अन्यायमा आधारित छ । सन्तोष सेनले यसलाई महाकथाको रूपमा चित्रण गर्दै यस प्रोजेक्टलाई सफल बनाउन कुनै पनि प्रकारको त्याग र बलिदान गर्न तयार रहेको बताए । फिल्म निर्माणमा दक्षिण भारतीय प्राविधिकहरूको टोली, जसमा द्वन्द निर्देशक स्टन्डर साम र छायाकार शरण ऋषि पनि सामेल छन् । फिल्मको लागि आवश्यक लाइट, साउन्ड र क्यामेरा जस्ता उपकरणहरू भारतको मुम्बईबाट ल्याइएको छ ।

फिल्मको छायाङ्कनका लागि इटहरीको बिएमसी स्टुडियोमा विशाल सेट तयार गरिएको छ भने विराटनगर क्षेत्रमा पनि थप सेट निर्माण गरिएको छ । यस्तै मोरङको कानेपोखरीमा बस्ती तयार गरिएको छ । निर्देशक सेनले करिब ६० प्रतिशत छायाङ्कन स्टुडियोमै गरिने जानकारी दिए । प्रमुख भूमिकामा अभिनेता बिराज भट्टका छोरा समीर भट्ट रहनेछन्, जसले भारतमा लामो समयदेखि अभिनय, मार्सल आर्ट र नृत्यको प्रशिक्षण लिएका छन् । सौगात मल्ल, अर्पण थापा, दिव्य देव र ऋचा शर्मा पनि प्रमुख भूमिकामा देखिनेछन् । ‘बलिदान’को निर्माण आसुसेन फिल्म्स प्रा.लि. र सन्तोष सेनको प्रस्तुतिमा पवन ब्राडफोर्ड बिस्टले गरेका छन् भने सह-निर्माताको भूमिकामा प्रेम पुरी रहेका छन्।