असोज ११ देखी प्रदर्शनमा आउने फिल्म ‘आँखा’को ‘खुशी’ गीत सार्वजनिक

इटहरी/ फिल्म ‘आँखा’को गीत ‘खुशी’ सार्वजनिक भएको छ । जुन आगामी असोज ११ गतेदेखि दर्शकमाझ प्रदर्शनमा आउने तयारीमा रहेको फिल्मको हरितालिका तीजको अवसरमा निर्माण टिमले यो गीतलाई दर्शकका लागि विशेष उपहारको रूपमा सार्वजनिक गरेको हो । गीतमा प्रकाश मल्ल र राम अविरल बिष्टको शब्द, पवन गिरी र मीना सिंहको स्वर तथा दीपक आरजेको संगीत छ । गंगा थापाको एरेञ्ज, राजीव एन्ड्रियू श्रेष्ठको मिक्सिङ र मास्टरिङले गीतलाई थप सशक्त बनाएको छ ।

स्मिता लामिछाने र आरके मेहतालाई फिचर गरिएको यस गीतले जीन्दगीमा खुशीको खोजी र त्यसलाई प्राप्त गर्ने सपनाहरूको कथा बोल्छ । मिठासपूर्ण शब्द र मन छुने संगीतको कारणले गर्दा गीतले दर्शकहरूको मन जित्ने अपेक्षा निर्माण पक्षले राखेको छ । भिडियोमा स्मिता र आरकेले गीतको भाव अनुसारको उत्कृष्ट अभिनय गरेका छन्, जसले गीतलाई अझ भावनात्मक बनाएको छ । हेर्नुस् भिडियो ।

जोन योन्जनको निर्देशनमा बनेको फिल्म ‘आँखा’को पोस्टर र टिजरले यसअघि दर्शकहरूमा राम्रो चर्चा पाइसकेको छ । चलचित्रकर्मी र शुभचिन्तकहरूले यसलाई सम्भावनावान फिल्मको रूपमा लिएको छन् । यो फिल्म ढाका टोपी फिल्मस्, कार्यक्रम नेपाल, साइलेन्ट एक्ट र ट्राइडेन्ट कन्सेप्टको सहकार्यमा निर्माण गरिएको हो । यसमा स्मिता लामिछाने र आरके मेहताका अलावा निशा अधिकारी, बुद्धि तामाङ, विजय बराल, सरोज खनाल, पशुपति राई, कृष्णभक्त महर्जन, राजन खतिवडा, प्रविण खतिवडा, लुनिभा तुलाधर, रविन्द्र झा, अभयराज बराल र बाल कलाकार प्रसन राई मुख्य भूमिकामा छन् ।

निर्देशक योन्जनको कथा र पटकथामा बनेको फिल्मका निर्माता पनि उनै हुन् भने कार्यकारी निर्माता नारायणप्रसाद बराल र सह-निर्मातामा रेनुका कार्की ढोली छन् । फिल्मको सम्पादन कृष्ण भण्डारी र निर्देशक योन्जनले गरेका छन् भने छायांकन आलोक शुक्लाले सम्हालेका छन् । संगीतकार दीपक आरजे र जयन जे वाइवाले फिल्मको संगीत भरेका छन् भने गंगा थापाले पार्श्व संगीत र किशोर आचार्यले ध्वनी मुद्रण गरेका छन् । ‘आँखा’ फिल्मको वितरण आरआर फिल्म्सले गर्नेछ । नदी किनारका सुकुम्बासीहरूको संघर्षलाई फिल्मले पर्दामा उतार्ने प्रयास गरेको छ ।