इटहरी/ म्युजिक भिडियो ‘राधा पियारी’ सार्वजनिक भएको छ । शुक्रबार ओ.एस.आर डिजिटलको युट्युब च्यानलबाट रिलिज गरिएको यो भिडियोमा नेपाली सिने क्षेत्रका दुई लोकप्रिय कलाकार पल शाह र मलिका महत प्रमुख भूमिकामा देखिएका छन् । यो गीतमा सन्देशमूलक कथा प्रस्तुत गरिएको छ, जसले हालको समाजिक परिस्थितिमा सहकारी पीडितहरूको कथा बोल्छ । भिडियो डान्सिङ बिटमा आधारित भएपनि यसको प्रमुख सार पीडितहरूको आवाजलाई उजागर गर्नु हो । भिडियोले देशभर छरिएर रहेका सहकारी पीडितहरूको लागि न्याय दिलाउने उद्देश्य बोकेको छ ।
भिडियोमा पल र मलिका प्रहरीको भूमिकामा छन्, जसले सहकारीको नाममा ठगी गरिरहेका व्यक्तिहरूलाई सस्पेन्स शैलीमा पक्राउ गर्छन् । यो भिडियोले कसरी उनीहरूले ठगहरूलाई जालमा पार्छन् भन्ने रोचक तरिकाले देखाउँछ । यो भिडियोमा पल शाह र मलिका महतको पुनर्मिलन देख्न सकिन्छ । पल शाहले बलात्कार केसमा एक वर्ष जेलमा बिताएपछि यो जोडीको पहिलो सहकार्य हो । दर्शकहरूले लामो समयदेखि प्रतीक्षा गरेका यी दुई कलाकारको जोडीलाई यस भिडियोमा पुनः देख्न पाउँदा उत्साहित भएका छन् । हेर्नुस भिडियो
गीतमा शान्ती श्री परियार र कृष्ण बी.के.को सुमधुर स्वर छ, जहाँ शब्द र संगीत पनि कृष्ण बी.के. स्वयंले भरेका छन् । भिडियोको निर्देशन जि.बी. अग्रले गरेका छन् भने सिनेमाटोग्राफी अर्जुन तिवारी र सम्पादन सुप्रिम पराजुलीको रहेको छ । संयोगवश, ‘राधा पियारी’ गीत सार्वजनिक भएको दिन नै राष्ट्रिय स्वतन्त्र पार्टीका सभापति रवि लामिछानेले सहकारी संस्था बचत रकम दुरुपयोग सम्बन्धमा संसदीय छानबिन विशेष समितिमा बयान दिएका थिए । यो घटनाले गीतको विषयवस्तुसँग सन्दर्भ जोडेको छ । गीतको मिक्सिङ र मास्टरिङ नरेश बिबिसीले गरेका छन् भने कोरियोग्राफी सञ्जय विश्वकर्माले गरेका छन् । निर्देशक जि.बी. अग्र र गायक कृष्ण बी.के. यो गीत र भिडियोले दर्शकको मन जित्नेमा आशावादी छन् ।
Discussion about this post