इटहरी/ फिल्म ‘नरसिंहाः अवतार’ को निर्माण क्रिएटिभ सिने आर्टको प्रस्तुतिमा हुँदैछ । जहाँ रोचक कलाकारहरूको लाइनअप तयार भएको छ । यो एक्सन तथा सोसल ड्रामा फिल्मका लागि अहिलेसम्म ६ जना मुख्य कलाकारहरू छनोट भइसकेका छन् । दिवाकर भट्टराईको निर्देशनमा बन्न लागेको यस फिल्ममा महानायक राजेश हमाल, नीति शाह, सरोज खनाल, प्रशान्त ताम्राकार, नीर शाह, सनिशा भट्टराई, र दीपा शाही अनुबन्धित भएका छन् । यसै क्रममा अभिनेता राज कटुवाल पनि फिल्ममा जोडिएका छन्, जससँगै मुख्य कलाकारहरूको लाइनअप पूरा भएको छ ।
हालसम्म फिल्ममा यी कलाकारहरूको भूमिका बारे निर्माण पक्षले कुनै जानकारी खुलाएको छैन । निर्देशक भट्टराईले कटुवाललाई फिल्ममा अनुबन्ध गराएपछि एउटा उत्कृष्ट नायकको उदय हुने आशा व्यक्त गरेका छन् । कटुवालले पनि यस फिल्ममा सहभागिता जनाउन पाउँदा खुसी व्यक्त गरेका छन् र आफूलाई निर्देशकले दिएको जिम्मेवारी पूरा गर्ने प्रतिबद्धता व्यक्त गरेका छन् ।
यो फिल्म विशेष रूपमा चर्चामा छ किनभने महानायक हमालले आठ वर्षपछि कमब्याक गर्दैछन् । लामो समयपछि हमाल फिल्ममा फर्किंदै गर्दा यो खबरले नेपाली फिल्म क्षेत्र तताएको छ । यसले गर्दा ‘नरसिंहाः अवतार’ प्रतीक्षित फिल्म बनेको छ । फिल्मको छायांकन भदौको अन्तिम साताबाट सुरु हुने तयारीमा छ भने निर्माण लागत तीन करोडभन्दा माथि हुने बताइएको छ । निर्देशक भट्टराईको अर्को फिल्म ‘मायावी’ पनि प्रदर्शनको तयारीमा रहेको छ र छिट्टै यसको प्रदर्शन मिति घोषणा निर्माण युनिटको भनाई छ ।
Discussion about this post