इटहरी/ केहि समयअघि काठमाण्डौमा सम्पन्न विवाहित महिलाहरुको सौन्दर्य प्रतियोगिता ‘मिसेस नेपाल वर्ल्ड २०२३’ का बिजेताहरुलाई पुरस्कार तथा प्रमाण-पत्र प्रदान गरिएको छ । प्रतियोगिकताकि बिजेता पृथ्विया थापालाई इलेक्ट्रिक स्कुटर तथा अन्य उपहारहरु प्रदान गरिएको छ भने फर्स्ट रनर्सअप आइना गजुरेल, सेकेन्ड रनर्सअप निशा बिस्ट, थर्ड रनर्सअप सरु राज्यलक्ष्मी राणालगायतका उप-विजेताहरुलाई विभिन्न पुरस्कारहरु प्रदान गरिएको छ ।
यो प्रतियोगितालाई रिबन इन्टरटेनमेन्टले आयोजना गरेको थियो । पुरस्कार वितरण कार्यक्रमबाट मिसेस् नेपाल इन्टरनेशनल सिर्जना केसीलाई टेलिभिजन, एमएस नेपाल इन्टरनेशन सीता सुवेदीलाई ओभन तथा मिसेस् नेपाल वर्ल्डको टप फ्यान सन्ध्या गैरेलाई भ्याक्युम क्लिनर प्रदान गरिएको छ । मिसेस् नेपाल वर्ल्ड २०२३ पृथ्विया थापाले यही जनवरीमा अमेरिकामा हुने मिसेस् वर्ल्ड, मिसेस् नेपाल इन्टरनेसनल सिर्जना केसीले सिंगापुरमा हुने मिसेस् इन्टरनेशनल, एमएस नेपाल इन्टरनेसनल सीता सुवेदीले सिंगापुरमै हुने एमएस इन्टरनेशनलमा नेपालको प्रतिनिधित्व गर्ने अवसर प्राप्त गर्नेछन् ।
विजेताहरूलाई रिबन इन्टरटेनमेन्टका अध्यक्ष निशुकान्त झा, त्रिभुवन अन्तर्राष्ट्रिय विमानस्थलका महाप्रबन्धक प्रतापबाबु तिवारी, बागमती प्रदेशकी सभासद् हरि प्रभा खड्गी, कर्णाली प्रदेशकी सभासद् जानकी सिंह, पत्रकार अखण्ड भण्डारी, ब्युटी पेजेन्ट एसोसिएसन अफ नेपालका अध्यक्ष गोपाल सुन्दर लाल कक्षपति, ग्रामीण महिला विकास तथा एकता केन्द्रकी महासचिव ज्योत्स्ना साउद, समाजसेवी डा. भद्रा भण्डारी, अभिनेत्री सरिता लामिछानेलगायतले पुरस्कार तथा प्रमाणपत्र प्रदान गरेका थिए ।
Discussion about this post