थापा परिवारले ‘ए मेरो हजुर ५’ फिल्म निर्माण तथा निर्देशन गर्ने छाँटकाँट

इटहरी/ फिल्म ‘ए मेरो हजुर’ नामबाट केहि अलग्गिएर ‘एक भगवत र एक गीता’ फिल्म निर्माण गरेको थापा परिवारलाई नराम्रो झट्का लाग्यो। धार्मिक संगठनहरुले नाममाथि विवाद सिर्जना गरेर तनाब भयो भने फिल्म रिलिजपछी अपेक्षाकृत ब्यापार फिल्मले गर्न सकेन। मेहनत र लगानी स्वाहा भयो भदा फरक नपर्ला। यतिबेला भने निर्देशक तथा एकसमयकी नाम कमाएकी अभिनेत्री झरना थापा तथा उनकी पति सुनिल कुमार थापा पुन: ‘ए मेरो हजुर’ नाममै फर्किने छाँटकाँट देखिएको छ।

सामाजिक संजालमा अंग्रेजी नयाँवर्ष २०२४ को शुभकामना दिदै झरनाले यस्तो छनक दिएकि हुन्। उनले सामाजिक संजालमा दिइएको शुभकामनासंगै ह्यासट्यागमा पाँचौँ चलचित्रको नाम उल्लेख गरेकी हुन् । झरना थापा निर्देशित गत भदौमा ‘एक भगवत् र एक गीता’ प्रदर्शनमा आएको थियो । यो फिल्मको असफलतापछि केही समय चुप बसेकी झरनाले अहिले फेरि नयाँ फिल्म अनौपचारिक रुपमा घोषणा गरेकी हुन् ।

उनले फिल्मको बारेमा अन्य जानकारी दिएकी छैनन् । तर, बुझिएअनुसार यतिबेला स्क्रिप्टको काम भैरहेको छ भने आगामी वर्षको भदौमा ‘ए मेरो हजुर ५’ को छायाङ्कन हुनेछ। यो फिल्मलाई २०८२ सालमा प्रदर्शन गरिने छ। स्वर्गीय शिव रेग्मी निर्देशित ‘ए मेरो हजुर’ को दोस्रो सिक्वेलबाट झरनाले निर्देशन गर्ने थालेकी हुन् । पाँचौं श्रृंखलालाई पनि उनले नै निर्देशन गर्नेछिन् । पाँचौ शृंखलामा पनि झरना तथा सुनिल पुत्री तथा अभिनेत्री सुहाना थापा नै मुख्य भूमिकामा प्रस्तुत हुने चर्चा छ ।