हर्क साम्पाङ्गप्रती समर्पित गर्दै राजेश पायल राईले गाए ‘हे हर्क अघि बढ पछि नफर्क’ भन्दै गीत

इटहरी/ श्रमसंस्कृतिको शहरको रुपमा अन्तरास्ट्रिय स्तरमा धरानलाई चिनाउने धरान उपमहानगरपालिकाका मेयर हर्क साम्पाङप्रति समर्पित गरेर तयार पारिएको ‘हे हर्क अघि बढ पछि नफर्क’ बोलको गीतको म्युजिक भिडियोसहित एक कार्यक्रमका बीच सार्वजनिक गरिएको छ । बिहिबार धरान ८ बराह मलस्थित फ्रेन्ड्स सिनेमा हलको पर्दामा भिडियो सार्वजनिक गरिएको थियो । सेवक अभियानका संयोजक राजिब हलवाईको रचना तथा निरज श्रेष्ठको संगीत रहेको उक्त गीतमा चर्चित गायक राजेश पायल राईले स्वर रहेको छ । उक्त गीत सिल्भर इन्टरटेन्मेन्टको अफिसियल युट्युब च्यानलबाट सार्वजनिक गरिएको हो ।

गीत सार्वजनिक कार्यक्रममा मेयर हर्क साम्पाङ आफ्नो परिवारसहित सहभागी थिए भने उपमेयर अइन्द्रबिक्रम बेघा, नायिक रेखा लिम्बु, गीतकार मीना सिंगकसहित श्रमदाताहरुको उपस्थिति रहेको थियो । सिल्भर इन्टरटेन्मेन्टका निर्देशक सौरभ श्रेष्ठको परिकल्पना र आग्रहमा एकै रातमा गीत लेखेको र यो गीत मेयर साम्पाङ्गको अहिलेसम्म गरेका काम तथा गतिबिधिसंगै उनलाई सुझाव समेत दिने प्रयास गरेको गीतकार हलवाईले बताए । मेयर साम्पाङको श्रमअभियान र विकासको कार्यबाट आफु प्रभावित भएर गीतको माध्यमबाट योगदान दिने प्रयास गरेको उनले बताए । हेर्नुस् भिडियो ।

गीतको म्युजिक भिडियोले मेयर साम्पाङ निवार्चित भएको, सपथ ग्रहण गरेको र त्यसपछि खानेपानी, वृक्षारोपण लगायत कार्यमा भएको श्रमदान अभियान, लागुपदार्थ दुर्व्यसन बिरुद्धको अभियानको दृष्यहरुलाई कैद गरिएको छ । गीतका गायक राजेश पायल राई भने उपस्थित थिएनन्, तर एक भिडियो सन्देश मार्फत उनले मेयर साम्पाङ्गको कामबाट प्रभावित रहेको बताउदै यो गीत श्रमदाताहरु प्रति समर्पित रहेको बताए । भिडियो हेरेपछि मेयर साम्पाङले गीतसंगै भिडियो राम्रो बनेको प्रतिक्रिया दिए । आफुले धेरै गीतहरु लेखेको छु, गाएको छु तर कलाको पारखी हुँ र थुप्रै फिल्महरु हलमा हेरियो तर आफ्नै फिल्म गीत मार्फत हेर्दा आँखामा आँशु आएको बताए । भावुक हुँदै साम्पाङले श्रमदान अभियानलाई श्रम क्रान्तिकोरुपमा अघि बढाउन सकेको भन्दै सबै पौरखी श्रमदाताहरुलाई धन्यवाद पनि दिए ।

उनले हर्क अब आफ्नो एक्लो नाम नभएको र देश उठाउन परिश्रम गर्ने व्यक्तिको नाम भएको पनि बताए । र यस्ता धेरै हर्कहरुले जन्म लिनुपर्ने बताए । उपमेयर अइन्द्रबिक्रम बेघाले पनि गीतले धरानमा के हुदैछ र धरानको पहिचान कस्तो बनाउदैछौं भनेर भिडियोले प्रष्ट पारेको बताए । संसार श्रमले नै बनेको धारणा गर्दै उनले श्रमलाई सम्मान गर्नुपर्ने र श्रम संस्कृतिको वास्ताविकता तथा शक्तिको उजागर धरानबाट भएको पनि बताए । सिल्भर इन्टरटेन्मेन्टको निर्माण रहेको म्युजिक भिडियोमा भुपेन्द्र लिम्बु तुम्बाहाम्फे, एडम लिम्बु, फुर्वा चुक्टे शेर्पा, राजेश शाक्य (टोनीं ) र कमानसिंह राईको छायांकन रहेको म्युजिक भिडियोको सम्पादन एडम लिम्बुले गरेका हुन् ।