सन्तोष सेनले भुकम्प पिडितका लागी ६१ हजारबढी सहयोग गर्ने, रोकियो ‘बलिदान’को टिजर रिलिज

इटहरी/ यतिबेला देश शोकमा डुबेको छ । शुक्रबार राति ११ः४७ बजे पश्चिम नेपालको कर्णाली प्रदेशस्थित जाजरकोटलाई केन्द्रविन्दु बनाएर गएको ६.४ म्याग्निच्युडको भुकम्पको धक्काले ठूलो जनधनको क्षती भएको छ । उक्त क्षतिमा मह्लम लगाउन यतिबेला सरकार, राजनैतिक दल, विभिन्न संघ संस्था तथा ब्यक्तिहरु जुटिरहेका छन् । यस्तैमा फिल्म निर्माता तथा निर्देशक सन्तोष सेनले आफ्नो कम्पनी आशुसेन फिल्म प्रोडक्सनको तर्फबाट प्रधानमन्त्री राहत कोषमा ६१ हजार ५ सय रुपैया सहयोग गर्ने बताएका छन् ।

सेनले निधन भएका नेपालिहरु प्रती श्रद्धाञ्जली र घाइतेहरुलाई सिघ्र स्वास्थ्यलाभको कामन गर्दै उक्त सहयोगको घोषणा गरेका हुन् । उक्त सहयोगको घोषणा गर्दै सेनले आगामी फिल्म ‘बलिदान’को प्री-टिजर सार्वजनिकको कार्यक्रम पनि हाललाई स्थगित गरेका छन् । उनले भोली आइतबार टिजर सार्वजनिक गर्ने तयारी गरेका थिए । देशमा आइपरेको दुखद अवस्थामा आफुले टिजर सार्वजनिक गर्न नसक्ने बताए । राहत तथा उद्धार कार्यमा प्रधानमन्त्रीको तर्फबाट भएको एक्शनलाई प्रशंसा गर्दै सेनले नेपाली सेना, नेपाल प्रहरी, स्वास्थ्यकर्मी तथा अन्य निकाय अहोरात्र खटिरहेको प्रती कृतज्ञ रहेको बताएका छन् ।

उनले सामाजिक संजालमा यस्तो लेखेका छन्:

“जाजरकोट रुकुम पश्चिम क्षेत्र फेरी उठने छ…”
कर्णालीको जाजरकोट र रुकुम पश्चिममा गएराती प्राकृतिक प्रकोप विनाशकारी ‘भुकम्प’मा परी सयौं जनाको दुःखद् निधन भयो सयौं संख्यामा नागरिक घाइते अवस्थामा छटपटाई रहनुभएको छ । मृतक आत्माको चिरशान्तीको कामना सहित घाईतेहरुको शिघ्रस्वास्थ्य लाभको कामना गर्दछौं ! यस विपत्तीबाट सयौं परिवार घरवार विहीन हुनुभएको छ !
यो घटनाले सम्पूर्ण नेपालीहरुको मन रोएको छ ! हामी पनि भावह्विल भएका छौं । यसप्रकारको पिडा र रोदनबाट अत्यन्तै जटिल अवस्थामा गुज्रीरहेको ठुलो विपत्तीबाट उठ्न हामी सबै एकजुट हुनुपर्ने बेला आएको छ । त्यहाँका नागरिकहरुको रोएको मनमा मल्हम लगाउन अत्यावश्यक छ अत: थोपा–थोपा मिलेर सागर बन्छ भनेजस्तै हामी पनि एउटा सानो सहयोग स्वरूप-आशुसेन फिल्म प्रोडक्सनको तर्फबाट प्रधानमन्त्री राहत कोषमा ६१ हजार ५ सय रुपैया“ सहयोग गर्ने निर्णय गरेका छौं । हरेक नेपालीले जसले आआफ्नो स्थानबाट सहयोग गर्नुभएको छ ! सबैप्रति हार्दिक आभार प्रकट गर्दछौं । राहत तथा उद्धारकार्यमा प्रधानमन्त्रीको तर्फबाट भएको एक्शनलाई प्रशंसा गर्दै नेपाली सेना,नेपाल प्रहरी,स्वास्थ्यकर्मी तथा अन्य निकाय अहोरात्र खटिरहनु भएको छ हामी कृतज्ञछौं !
यसै सन्दर्भमा हामीले भोली सार्वजनिक गर्ने भनिएको नयाँ फिल्म ‘बलिदान’ को पहिलो टिजर केही समय
को लागी स्थगित गर्ने निर्णय गरेका छौं ।
सबैप्रति हार्दिक आभार ।”

पछिल्लो विवरण अनुसार जाजरकोट र रुकुम पश्चिममा भुकम्पका कारण निधन हुनेको संख्या १५७ पुगेको छ भने १ सय १९७ जना घाइते भएका छन् ।