इटहरी/ फिल्म ‘अग्निदहन’को ‘दाइ दाइ नभन मलाई’ बोलको नयाँ गीत सार्वजनिक भएको छ । जसमा पार्वती जिसी र तुलसी क्षेत्रीको स्वर, परशुराम अधिकारीको संगीत र लोकमणि पौडेलको रचना छ । धर्मेन्द्र पौडेलको कोरियोग्राफीमा बनेको यो गीतको भिडियोमा फिल्मका कलाकारहरू अनुपमा भण्डारी, प्रमिला तुलाचन, रमा त्रिपाठी, सनिशा भट्टराई लगायतले नृत्य प्रस्तुत गरेका छन् । विवाहको सेटअपमा तयार पारिएको यो रत्यौली गीत झ्याउरे लयमा आधारित छ । जहाँ पश्चिम नेपालतिर प्रचलित महिलाहरू पुरुषको भेषमा नाच्ने ‘लुठो’ बन्ने प्रचलनलाई प्रस्तुत गरिएको छ ।
भिडियोमा रमा त्रिपाठी ‘लुठो’ बनेकी छन् । साहित्यकार लोकमणि पौडेलको उपन्यास ‘अग्निदहन’ मा आधारित यो फिल्म बोक्सीको अन्धविश्वासविरुद्ध तयार गरिएको हो । नेपाललाई बोक्सी प्रथाबाट मुक्त गराउने उद्देश्यले २०७१ मा स्थापना भएको मान्छे बोक्सी हुन्न कहिल्यै राष्ट्रिय जागरण प्रतिष्ठानले यस फिल्मको निर्माण गरेको हो । फिल्म आगामी मंसिर ७ गते प्रदर्शनमा आउनेछ । हेर्नुस् सार्वजनिक भिडियो ।
निर्देशक घनश्याम लामिछानेले फिल्ममा थ्रिलर र सस्पेन्सका साथै समाजमा गहिरो सन्देश दिने उद्देश्यले सिनेम्याटिक शैलीमा प्रस्तुत गरिएको बताए । फिल्मको प्रमुख भूमिकामा प्रकाश घिमिरे, प्रमिला तुलाचन, माओत्से गुरुङ लगायतका कलाकारले अभिनय गरेका छन् । फिल्ममा लोकमणि पौडेलको कथा, कोविदशरण उपाध्यायको परिकल्पना, परिच्छेद सेनको सहायक निर्देशन, शंकर पाण्डेको प्रोडक्सन डिजाइन र दीर्घ गुरुङको छायांकन समावेश गरिएको छ ।
यसअघि नै यो फिल्मले चलचित्र विकास बोर्डबाट ‘विशेष चलचित्र अवार्ड’ प्राप्त गरिसकेको छ । फिल्मलाई निवर्तमान राष्ट्रपति विद्यादेवी भण्डारीदेखि प्रधानमन्त्री र विभिन्न उच्च पदस्थ व्यक्तित्वहरूले समेत हेरिसकेका छन् भने सकारात्मक प्रतिक्रिया पाएको छ । साथै, केही समयअघि भारतको सीतामढीमा कमाण्डेन्ट अफ एसएसबी-२० औं बटालियनमा पनि यो फिल्म प्रदर्शन गरिएको थियो । जसले अन्तर्राष्ट्रिय स्तरमा पनि समाजमा बोक्सीप्रथाको अन्त्यको सन्देश प्रवाह गरेको छ ।
Discussion about this post