इटहरी/ अभिनेता तथा युवा ज्योतिष हरिहर अधिकारी र अभिनेत्री नीता ढुंगानाको प्रमुख भुमिकामा अभिनय रहेको फिल्म ‘ह्रस्व दीर्घ’ रिलिजको संघारमा रहँदा ‘भगवान नै आमा हुन्’ बोलको गीत सार्वजनिक भएको छ । चन्द्र पन्तले निर्देशन गरेको यस मल्टिस्टारर फिल्ममा प्रेम सम्बन्धको रक्षाका लागि हरि र नारायणी नामक जोडीले गर्ने संघर्षको कथावस्तु प्रस्तुत गरिएको छ । सार्वजनिक गीत सत्यराज आचार्यको स्वरमा सजिएको छ भने गीतमा बाबुल गिरीले शब्द, संगीत, एरेन्ज र मिक्सिङ गरेका छन् ।
यस्तै बाल स्वरमा स्वर्णिम कठायत, आयुष गिरी र ओजस्वी बजगाँई छन् । गीतको लिरिकल एनिमेसन दिनेश विष्टले तयार पारेका छन् । यो गीतको भिडियोको सुरुमै एक महिलाले कालो चस्मा लगाएर लहरै खेल्दै गरेका बालबालिकालाई बस दुर्घटनाबाट जोगाएको दृश्य समावेश गरिएको छ । जसले गर्दा यो फिल्मले आमाछोराको सम्बन्धको भावनात्मक कथा प्रस्तुत गर्ने पनि अड्कल गर्न सकिन्छ । हेर्नुस् भिडियो ।
भिडियोमा दुधे बच्चा सहित अभिनेत्री बिपना थापालाई दु:ख र सुखका पलहरुमा देख्न सकिन्छ । सार्वजनिक गीतमा आमाको ममता, स्नेह र आमाको गरिमालाई महत्त्वका साथ उठान गरिएको छ । ‘ह्रस्व दीर्घ’ फिल्ममा हरिहर अधिकारी र नीता ढुंगानासँगै साउथ इन्डियन कलाकार ब्रम्हनन्दम, सुनिल बर्मा, मोहम्मद अली, कुबीर दुहानसंगै नेपालका लोकप्रिय कलाकारहरू विपना थापा, रेखा थापा, आदर्श मिश्रा, गरिमा शर्मा, प्रशान्त ताम्राकार, संचिता लुइँटेल, अग्रिम पण्डित, निर्मल शर्मा, बुद्धि तामाङ, रविन्द्र झा लगायतका कलाकारहरूको पनि विशेष भूमिकामा अभिनय रहेको छ ।
यो फिल्मलाई ‘नीता फिल्म्स’ले निर्माण गरेको हो भने यहि कात्तिक ३० गते नेपाल र भारतमा एकैसाथ रिलिज हुँदैछ । दक्षिण भारतीय कलाकारहरुको पनि भूमिका भएकाले फिल्मप्रति विशेष चासो छ । धेरैले यो फिल्मको पोस्टर, टिजर तथा ट्रेलर हेर्दा साउथ इन्डियन फिल्म भनेर झुक्किएका पनि छन् । फिल्मको सार्वजनिक प्रचारप्रसार सामग्रीलाई धेरैले उत्सुकताका साथ लिएका छन् । नेपालमा नेपाली र हिन्दी दुबै भाषामा प्रदर्शन हुने यस फिल्मलाई नेपाल र भारतबाहेकका मुलुकमा एकसातापछि रिलिज गर्ने योजना छ भने जापानका १४ सहरमा डिसेम्बर ७ देखि प्रदर्शन गरिने निर्माण युनिटले जनाएको छ ।
Discussion about this post