इटहरी/ कोशी प्रदेशका मुख्य पाँच शहर विराटनगर, इटहरी, धरान, दमक र विर्तामोडमा कात्तिक ३० गतेदेखि प्रदर्शन हुने प्रतिक्षित नेपाली फिल्म ‘ह्रस्व दीर्घ’को पोस्टर पब्लिसिटी सम्पन्न भएको छ । फिल्मको प्रचारका लागि यी शहरका २५० सफारी र अटोहरूमा पोस्टर राखिएको छ । जसमा प्रत्येक शहरमा ५० वटा सफारी र अटो समेटिएको थियो । यो क्रममा कतिपयले पोस्टरलाई हिन्दी वा साउथ भारतीय फिल्मको पोस्टर भनेर झुक्किएको प्रतिक्रिया दिएका छन् । पोस्टर प्रचारसँगै ट्रेलर पनि देखाइएको थियो जसमा स्थानीय दर्शकहरूको रियाक्सन र रिभ्यु लिइयो ।
अधिकांशले ट्रेलर युट्युबमा पहिले नै हेरेको बताएका थिए र फिल्मको स्तर उच्च रहेको प्रतिक्रिया दिएका छन् । प्रतिक्रियामा धेरैले यो फिल्म ‘साउथ लेभल’को बनेको बताए भने फिल्मको निर्माण शैली र प्रस्तुतिलाई साउथ भारतीय शैलीमा तुलना गरिएको बुझिन्छ । ‘ह्रस्व दीर्घ’ फिल्म निता ढुंगानाले निता फिल्मसको ब्यानरमा निर्माण गरेकी हुन्, जुन उनको डेब्यु निर्माण हो । उनले यसमा प्रमुख भूमिकामा अभिनयसमेत गरेकी छिन् भने अभिनेता हरिहर अधिकारीले पनि प्रमुख भूमिकामा अभिनय गरेका छन् ।
यसैबीच, देशका ठूला सिनेमा चेन क्विएफएक्सले अग्रीम अनलाइन टिकट बुकिङ सुरु गरिसकेको छ । बुकिङ खुलेसंगै दर्शकहरुले अग्रिम सिट सुरक्षित गर्न थालिसकेका छन् भने अन्य हलहरुले पनि आजबाट अग्रिम टिकट बुकिङ खुलाउने तयारिमा छन् । यस्तै फिल्म रिलिजको संघारमा सार्वजनिक गरिएको ‘आमा’ शीर्षकको गीतले पनि मनछुने प्रतिक्रिया पाइरहेको छ । निर्देशक चन्द्र पन्तको निर्देशनमा तयार यो मल्टिस्टारर फिल्मले प्रेम सम्बन्धको रक्षा गर्न हरि र नारायणी नामक जोडीको संघर्षको कथा प्रस्तुत गरेको छ ।
फिल्ममा हरिहर अधिकारी र नीता ढुंगानासँगै साउथ इन्डियन कलाकार ब्रम्हनन्दम, सुनिल वर्मा, मोहम्मद अली, कुबीर दुहान र नेपाली कलाकारहरू विपना थापा, रेखा थापा, आदर्श मिश्रा, गरिमा शर्मा, प्रशान्त ताम्राकार, संचिता लुइँटेल, अग्रिम पण्डित, निर्मल शर्मा, बुद्धि तामाङ र रविन्द्र झा लगायतको पनि विशेष भूमिका छ । नेपाल र भारतमा कात्तिक ३० गते एकसाथ प्रदर्शन हुने यो फिल्मलाई जापानका १४ शहरमा पनि डिसेम्बर ७ देखि प्रदर्शन गरिनेछ । नेपाल र भारत बाहेक अन्य मुलुकहरूमा फिल्म एक हप्ता ढिला प्रदर्शन गर्ने योजना रहेको निर्माण युनिटले जनाएको छ ।
Discussion about this post