इटहरी/ तिहारको सांस्कृतिक र पारिवारिक मर्मलाई विदेशमा बसोबास गर्ने नेपालीहरूको जीवनसँग जोड्दै निर्माण गरिएको म्यूजिकल फिल्म ‘रमाइलो तिहार’ सार्वजनिक गरिएको छ । सार्वजनिक गीतको भिडियोमा तिहारको भावनात्मक कथा प्रस्तुत गरिएको छ । यस भिडियोमा दिदीले आफ्नो भाइलाई सप्तरङ्गी टिका र मखमली माला लगाइ दीर्घायुको कामना गर्न नेपालबाट अमेरिका यात्रा गरेकी छिन् ।
लामो समयदेखि विदेशमा रहेका भाइसँगको पुनर्मिलन र दिदीले भाइको पोडकास्टमा अतिथि बनेर व्यक्त गरेको एक गम्भीर प्रश्नले सम्पूर्ण नेपालीहरूको भावनात्मक अनुभवलाई उजागर गर्छ । जसले आधुनिक समाजको संरचना र परिवेशमाथि समेत प्रश्न उठाउँछ । यो भिडियोलाई जोयस पाण्डेको निर्देशनमा तयार गारिएको हो । जसले नेपाली सिनेमा क्षेत्रमा साङ्गीतिक र सांस्कृतिक दृष्टिकोणबाट तिहारलाई नयाँ शैलीमा प्रस्तुत गरेका छन् । हेर्नुस् भिडियो ।
सार्वजनिक गीतमा भने प्रताप दासको स्वर र रमेश क्षेत्रीको संगीत समावेश गरिएको छ । अमेरिकाको ह्यप्पी होम स्टुडियोजको ब्यानरमा निर्माण गरिएको यो भिडियोमा पूजा चन्द, राज वल्लभ कोइराला, समीर रेग्मी, आकृति काफ्ले, मनोरथ खनाल, आकाश खतिवडा, दिलिप श्रेष्ठ र अपार श्रेष्ठको अभिनय रहेको छ ।
भिडियोमा समीर रेग्मीलाई विशेष रूपमा नेपाली कला र संस्कृति प्रति समर्पित पात्रका रूपमा चित्रण गरिएको छ । ताइवानका चिनइन गावोको छायांकन र निशान घिमिरेको सम्पादनले फिल्मलाई थप जीवन्त बनाएको छ । रमाइलो तिहारले परदेशमा रहेका नेपालीहरूको चाडपर्व र परिवारसँगको सम्बन्धलाई विश्वव्यापी रूपमा प्रस्तुत गर्दै नेपाली कला र संस्कृतिलाई अन्तर्राष्ट्रिय स्तरमा स्थापित गर्न महत्त्वपूर्ण योगदान पुर्याएको छ ।
Discussion about this post