निर्माता ज्योतिराज राईको हातबाट सुनचाँदि जडित करिव ८ लाख पर्ने ट्रफी हस्तान्तरण

इटहरी/ नेपाल चलचित्र विकास बोर्ड अन्तर्गत आदिवासी जनजाति मातृभाषी चलचित्र प्रवर्द्धन समितिका संयोजक तथा फिल्म निर्माता ज्योतिराज राईले ‘सातौं बेलबारी आरजु राईस अन्तर्राष्ट्रिय आमन्त्रण गोल्डकप’का लागि रनिङ ट्रफी प्रदान गरेका छन् । आज असोज ६ गते आइतवार बेलबारी नगरपालिकामा आयोजित पत्रकार सम्मेलनमा उक्त ट्रफी सार्वजनिक गरिएको हो ।

राइका अनुसार उक्त ट्रफी आफ्ना स्व. बुवा मेजर एन. बि. रुङमाहाङ राईको स्मृतिमा आफुसंगै परिवारका सदस्य पोपिराज राई, पबित्रा राई, सरला राई र नानू राईको तर्फबाट सौजन्य गरेको जानकारी गराए । ट्रफीमा २ तोला सुन र २ किलो ५ सय ग्राम चाँदी जडित रहेको छ । पत्रकार सम्मेलनमा बोल्दै राईले यो ट्रफी तयार गर्न करिब ८ लाख रुपैयाँ लागेको जानकारी गराए । ट्रफी तीन पटक लगातार विजेता बन्ने टोलीलाई ट्रफीको मुल्य अनूरूपको रकम प्रदान गरिने आयोजकको भनाई छ ।

पत्रकार सम्मेलनमा बेलबारी नगरपालिकाका मेयर दिल प्रसाद राई प्रमुख अतिथि रहेका थिए । उक्त ट्रफीलाई निर्माता राईको हातबाट अनावरण गर्दै आयोजक एल एक्स सिटी फुटबल क्लब अध्यक्ष बीक्रम बान्तावा राई र बेलबारी नगरपालिकाका मेयर दिल प्रसाद राईलाई हस्तान्तरण गरेका थिए । यो विशेष अवसरमा राईले आफ्नो जन्मथलोमा योगदान गर्न पाउँदा गर्वको अनुभूति भएको बताए । साथै, उनले २०४८/४९ सालमा आफ्ना बुवाको नाममा नकआउट फुटबल खेलको आयोजना गरेको स्मरण गरे । उक्त बेला त्यसलाई पुर्णता दिन नसकिरहेको अवस्थामा अहिले फेरि यो खेलमा संलग्न हुन पाउँदा आफ्नो परिवारको लागि ऐतिहासिक क्षण भएको उल्लेख गरे ।

साथै यस्तो सूवर्ण अवसर प्रदान गर्न सूझाब र सहयोग गर्नूहुने गोबिन्द भन्डारी, एल एक्स सिटी फुटबल क्लबका अध्यक्ष बिक्रम बान्तावा राई लगायत सम्पुर्ण सूभचिन्तक र टीम प्रती निर्माता राईले धन्यवाद दिए । ‘सातौं बेलबारी आरजु राईस अन्तर्राष्ट्रिय आमन्त्रण गोल्डकप’ मोरङको बेलबारी नगरपालिका ११ लक्ष्मी खेल मैदान, लक्ष्मी मार्गमा असोज ११ गतेदेखि असोज १९ गतेसम्म संचालन हुनेछ । यस प्रतियोगिताको आयोजना एल एक्स सिटी फुटबल क्लबले गर्नेछ । खेलकुदले स्थानीय खेलाडी र खेलकुदप्रेमीहरूलाई प्रोत्साहन प्रदान गर्ने विश्वास गरिएको छ ।