इटहरी/ ‘कृष्ण कन्हैया’ बोलको भजन गीतको भिडियो सार्वजनिक गरिएको छ । सार्वजनिक भजन गीतमा मोडल मेनुका माझी र दिनेश कोइराला फिचर्ड भएका छन् । यी २ भजन गीतमा पहिलो पटक देखिएका हुन् । मेनुकालाई राधाको अवतारमा देखाईएको छ भने दिनेशलाई कृष्णको अवतारमा प्रस्तुत गरिएको छ । राधा बनेकी मेनुका र कृष्ण बनेका दिनेशको क्यामेस्ट्री लोभलाग्दो छ । फिल्म तथा अन्य म्युजिक भिडियोहरुमा देखिएको लुक्स भन्दा भिन्दै अवतारमा दिनेश प्रस्तुत भएका छन् ।
उनले यो भिडियोमा दार्हीजुँगा काटेका छन् । यसअघिका फिल्म तथा म्युजिक भिडियोहरुमा उनी छपक्क दार्हीजुँगामा मात्रै प्रस्तुत भैरहेका हुन्थे । त्यसैले पनि यो भिडियोमा उनलाई केही भिन्न देखिएको छ । यता मेनुकाको पनि सालिन अवतारले सबैलाई लोभ्याउछ । राधा पात्रमा देखिएकी मेनुकाले लगाएको पहिरन सुहाएको छ । भोजपुरी र मैथिली म्युजिक भिडियोमा बढी देखिने मेनुकाले पछिल्लो समय उताको ब्यस्ततालाई घटाउदै नेपाली म्युजिक भिडियोहरुलाई बढी समय दिइरहेकी छन् । हेर्नुस् भिडियो ।
सार्वजनिक गीतमा तृप्ती खड्का गुरुङको स्वर तथा संगीत रहेको छ भने भिडियोलाई अरुण कुमार प्रधानले निर्देशन गरेका हुन् । इटहरीको धार्मिक स्थल नयाँ बृन्दाबन गौसाला र श्री कृष्ण प्रणामी मन्दिरमा छायांकन गरिएको भिडियो सुमन तामाङले खिचेका हुन् । यो भिडियोमा हेमन तामाङले सम्पादन र कलरिङको काम गरेका हुन् । जय सियाराम क्रियसन, मेनुका माझी र ज्ञानेन्द्र गदाल यो भिडियोको निर्माता हुन् भने यस्लाई कोशी भिजन फिल्म्स प्राली इटहरीमा पोस्ट प्रोडक्सन गरिएको हो ।
Discussion about this post