इटहरीको इन्डोर स्टुडियोमा ‘बलिदान’, ४० फिटको दुर्गा मुर्तीसहित हजारौं मान्छेका बिच ५ सय जनाको एक्सन दृष्य

इटहरी/ आसुसेन फिल्मस् प्रालिको ब्यानरमा निर्माण हुने तयारिमा रहेको प्रतिक्षित फिल्म ‘बलिदान’ को छायांकन यसपटक कोशी प्रदेशमा हुने भएको छ । स्मरण रहोस् यसअघि विसं २०५४ सालमा प्रदर्शन भएको ‘बलिदान’ फिल्म पनि कोशी प्रदेशको धरान र इनरुवामा अधिकांश दृष्यहरु छायांकन भएको थियो । अहिलेको बलिदान पनि यतै हुने पक्कापक्की भएपछी एउटा संयोग जुरेको छ । फिल्मका निर्माता तथा निर्देशक सन्तोष सेन, सहायक निर्माता तथा कलाकार प्रेम पुरी लगायतको टिम २ दिनदेखी इटहरी, बिराटनगर लगायतका ठाउँमा लोकेसन हेर्न लागिपरेका छन् ।

लोकेसन हेर्ने र फाईनल गर्ने क्रममा ‘बलिदान’ को छायांकन इटहरीमा अवस्थित नेपालकै ठूलो भनिएको इन्डोर स्टुडियो ‘बिएमसी स्टुडियो’ फाईनल भएको छ । यो स्टुडियोमा फिल्मको ४५ प्रतिशत छायांकन हुने निर्माता तथा निर्देशक सेनले परिकला न्युजलाई जानकारी गराए । स्टुडियो फाईनल भएसंगै सेट डिजाइनको काम पनि सुरु भएको छ । ‘बिएमसी स्टुडियो’ भर्खरै निर्माण भएको हो । यो स्टुडियो बलिदानको छायांकन संगसंगै सुभारम्भ हुनेछ । सेनका अनुसार यत्तीको इन्डोर स्टुडियो नेपालमा छैन । उनी भन्छन् ‘अबका दिनमा यहि स्टुडियोका कारण इटहरी फिल्म छायांकनका लागी हब बन्न सक्छ’ ।

२ ओटा भब्य स्टुडियो ३० कट्ठा जग्गामा निर्माण भएको छ भने एक स्टुडियोलाई ‘फाइभ एफएक्स’ नाम दिइएको छ जुन स्टुडियोको चौडाइ ४० फिट, लम्बाइ ८० फिट र उचाइ ४० फिटको रहेको छ । यो स्टुडियोमा विशेषगरि क्रोमामा छायांकन गर्ने, भिएफएक्स गर्ने र वाटर फल्स लगायतको छायांकन गर्ने नेपालकै ठूलो स्टुडियोको रुपमा रहेको छ । यस्तै ‘सेभेन एफएक्स’ नाम दिइएको अर्को स्टुडियोको ४० फिट चौडाइ, ४० फिट हाइट र १६० फिट लम्बाइ रहेको छ । यत्तिको ठूलो स्टुडियो ‘वलिदान’ छायांकनको लागी पाँउदा निर्माता तथा निर्देशक सेन दङ्ग छन् ।

यस्तै इन्डोर छायांकनको लागी यो स्टुडियो फाईनल भएसंगै इटहरी आसपास आउडडोर ४/५ ओटा लोकेसन पनि फाईनल भैसकेको सेनले बताए । फिल्म निर्माण युनिटले बिराटनगरको मेडिकल कलेजको पछाडी रहेको खाली जग्गामा पनि भब्य सेट लगाएर ‘बलिदान’को छायांकन गरिने पक्का भएको छ । जहाँ ४० फिटको दुर्गा माताको मुर्ती लगाएर हजारौं मान्छे उतारिने छ भने त्यहाँ ५०० जनाको एक्सनको दृष्य खिचिने छ । यसअघि फिल्मको छायांकन भएको प्री-टिजरले पनि धेरैको ध्यान ‘बलिदान’ तिर तानिएको छ । पछिल्लो समय फिल्ममा एक्सन स्टार बिराज भट्टका छोरा समीर भट्टको इन्ट्री र उनको क्यारेक्टर लुक्सले त झनै फिल्मलाई प्रतिक्षित बनाएको छ । दर्शन जिले लेखेको फिल्म बलिदानमा केहि दिनअघि प्रमुख अभिनेत्रीको रुपमा ऋचा शर्मा अनुबन्धित भएकी छन् । फिल्मका लागी चाहिने अन्य प्रमुख तथा सहायक पात्रहरुको खोजी भैरहेको निर्माण युनिटको भनाइ छ ।