इटहरी/ यहि महिना चैतको ९ गतेबाट प्रदर्शनमा आएको फिल्म ‘महाजात्रा’ले प्रदर्शनको २ सातामा दश करोड चौध लाख ग्रस कलेक्सन गरेको छ । आज शुक्रबारबाट यो फिल्म सफल प्रदर्शनको तेश्रो सातामा प्रवेश गरेको हो । ‘जात्रा’ र ‘जात्रै जात्रा’ पछि षट्कोण आर्ट्सले निर्माण गरेको तेस्रो भाग ‘महाजात्रा’ले पहिलो साता ६ करोड २४ लाख र दोश्रो साता तीन करोड नब्बे लाख ग्रस कलेक्सन गरेको निर्माण युनिटको भनाई छ ।
ब्राण्ड भ्यालु बनाएको फिल्म भएको कारण पनि महाजात्राले उच्च शो पाएको थियो । तेश्रो सातामा आईपुग्दा समेत देशभरका फिल्म हलहरुमा राम्रो शो पाईरहेको छ । नेपाल कम्युनिष्ट पार्टी (एमाले) का अध्यक्ष तथा पूर्वप्रधानमन्त्री केपी शर्मा ओली, उपप्रधानमन्त्री तथा गृहमन्त्री रवि लामिछाने, पूर्वप्रधानमन्त्री डा बाबुराम भट्टराई, पूर्वरानी कोमल राज्यलक्ष्मी शाह लगायतका विशिष्ट व्यक्तिले समेत हेरिसकेको फिल्मलाई सकारात्मक प्रतिक्रिया प्राप्त भैरहेको छ ।
फिल्ममा फडिन्द्र (विपिन कार्की), जोयश (रवीन्द्रसिंह बानियाँ) र मुन्ना (रवीन्द्र झा) बीचको मित्रतालाई देखाईएको छ । फिल्मका यी तीन पात्रले जीविकोपार्जनका लागि गर्ने सङ्घर्ष, विभिन्न अवरोधमा टिकेको मित्रता र उनीहरूको गरिवीले डगमगाउन नसकेको नैतिकतालाई रोमाञ्चक ढंगले प्रस्तुत गरिएको छ । फिल्ममा हरिवंश आचार्य, वर्षा राउत, दिव्य देव, अर्जुनजंग शाही, प्रकाश घिमिरे, राजाराम पौडेल, प्रवीण खतिवडा, सुमन कार्की, शिशिर बाङ्देल, गौमाया गुरुङ, अरविन खड्का लगायतको अभिनय रहेको छ ।
फिल्मलाई म्याक्स दीपेश खत्री र यज्ञश्वर पौडेलले संयुक्त रुपमा निर्माण गरेका हुन् । नेपाल बाहेकका देशहरुमा समेत महाजात्राले राम्रो दर्शक तान्न सफल भएको छ । मध्यपूर्वका ठूला सिनेमा चेनहरु भक्स, स्टार, सिने रोयल, सिनेपोलिस, सिनेको र नोभामाविदेशी फिल्म झैँ ‘महाकात्रा’ नियमित प्रदर्शन भइरहेको छ ।
Discussion about this post