प्रकाश सपूतको ‘गलबन्दी’ मा नाचे प्रधानमन्त्री प्रचण्ड

इटहरी । पोखरा सहरलाई औपचारिक रुपमा पर्यटकीय राजधानी घोषणा गर्न आयोजित समारोहमा सहभागी हुन पोखरा पुगेका प्रधानमन्त्री पुष्पकमल दाहाल ‘प्रचण्ड’ गायक प्रकाश सपूतको गलबन्दी गीतमा छमछमी नाचेका छन्। कार्यक्रममा गायक सपूतले प्रस्तुति दिएका थिए । सोही क्रममा उनले जनताको माझ एक पटक नाच्न भन्दै आग्रह गरेपछि प्रधानमन्त्री प्रचण्ड, गण्डकीका मुख्यमन्त्री सुरेन्द्रराज पाण्डे, पूर्वमुख्यमन्त्री खगराज अधिकारी, पोखरा महानगरका मेयर धनराज आचार्य, माओवादी केन्द्र गण्डकी प्रदेश संसदीय दलका नेता हरिबहादुर चुमान लगायतले स्टेजमा छमछमी नाचेका छन् । सपुतले पञ्जैबाजाको अर्को ट्रयाकमा पनि उपस्थितलाई नचाए । प्रचण्डलाई अब्बल क्रान्ति नायक भन्दै गायक सपुतले उनीसामु आफूले पहिलो सांगीतिक प्रस्तुति रहेको बताए ।

सपुतले ‘गलबन्दी’ गीत गाउन सुरु गर्दा प्रधानमन्त्री प्रचण्डसहितका अतिथि सबै उठेर मंचमा नाच्न तयार भएका थिए । अर्का गायक धर्मेन्द्र सेवानले अर्को चर्चित गीत ‘रेशम फिलिली’ गाएर समारोहमा मनोरञ्जन दिए । गायक प्रमोद खरेलले पनि सांगीतिक प्रस्तुति दिएका थिए ।